Awstriýa-Türkmen jemgyýetiniň prezidenti Neda Berger 2025-nji ýylyň öňüsyrasynda «Turkmenportal» internet neşiriniň işgärlerine gutlag telegrammasyny ugratdy. Ol öz gutlag ýüzlenmesinde bilelikdäki taslamalary beýan etmekde we diňe Türkmenistanda däl, eýsem hem Awstriýada, şeýle-de beýleki ýurtlarda okyjylaryň ünsüni çekýän interwýulary taýýarlamakda redaksiýanyň ýokary derejeli hünärmenleriniň bardygyny aýratyn belledi.
Jemgyýetiň baştutany öz gutlag hatynda «Turkmenportala» işinde mundan beýläk hem üstünlikleri, täze taslamalary durmuşa geçirmegi we hünär mümkinçiliklerini giňeltmegi arzuw etdi. Neda Berger şeýle hem täze ýylda netijeli hyzmatdaşlygyň dowam etjegine umyt bildirdi.
«Täze ýylda siziň hemmäňize we her biriňize berk jan saglyk, bagt, abadançylyk arzuw edýärin!» - diýip, Berger «Turkmenportalyň» işgärlerine ýüzlendi.
Awstriýa-Türkmen jemgyýeti «Turkmenportalyň» köp ýyllyk hyzmatdaşy bolup, iki ýurduň arasynda maglumat alyş-çalşygyny ösdürmäge işjeň ýardam berýär.
