Okuw gollanmasy sport žurnalistikasy hünärinde bilim alýan talyp ýaşlara sport fotožurnalistikasynyň aýratynlyklaryny öwretmegi maksat edinýär. Türkmen döwlet bedenterbiýe we sport institutynyň ylym bölüminiň başlygy Ş.Nepesowyň taýýarlamagynda «Ylym» neşirýaty tarapyndan neşir edilen okuw gollanmasy žurnalistika ugrundan okaýan talyplar üçin niýetlenilendir. Bu barada Türkmenistanyň Bilim ministirliginiň resmi saýtynda habar berildi.
Sport žurnalistikasy hünärinde bilim alýan talyp-ýaşlaryň sport fotožurnalistikasynyň aýratynlyklaryny ýokary derejede ele almaklaryny gazanmak, olara sport fotosuratlaryny taýýarlamak, metbugat neşirlerinde fotosuratlary ýerleşdirmegi öwretmek, sport fotožurnalistiniň işleriniň köptaraplylygyny, şeýle-de ýurtda neşir edilýän gazet-žurnallaryň we daşary ýurtlaryň fotožurnallarynyň üsti bilen sport suratlaryny, kadrlaryny içgin seljermegi öwretmek täze kitapda göz öňünde tutulan esasy zatlardyr.
Okuw gollanmasy girişden, «Sport fotožurnalistikasy dersiniň maksady we wezipeleri», «Fotografiýanyň döreýiş taryhy», «Fotožurnalistikanyň taryhyndan umumy maglumat», «Fotožurnalistika türkmen metbugatynda», «Türkmen metbugatynyň taryhyndan», «Sportuň adamzat jemgyýetinde tutýan orny», «Sport – fotožurnalistikanyň bir ugry hökmünde», «Sport bilen bagly ilkinji gazet-žurnallar», «Türkmen sport fotožurnalistleri», «Sport fotožurnalistine kömek: sport ýaryşlaryndan nähili surat almaly?», «Sportuň görnüşlerine görä surata almagyň aýratynlyklary», «Internet we sport fotožurnalistikasy», «Sport fotožurnalistikasynyň žanrlary», «Fotodükanlar. Olaryň metbugatda we internet saýtlarynda ulanylyşy», «Sport fotožurnalistikasy we etika» atly bölümlerden ybaratdyr.
