Türkmenistanda 2025-nji ýyl «Halkara parahatçylyk we ynanyşmak ýyly» şygary bilen geçer, Türkmenistanyň Prezidenti Täze ýyl baýramçylygynda hukuk we tertip-düzgüni üpjün etmegi tabşyrdy, Arsen Şahuns Aşgabatda ajaýyp konsert bilen çykyş etdi we beýleki habarlar
Türkmenistanda
1. Türkmenistanda 2025-nji ýyl «Halkara parahatçylyk we ynanyşmak ýyly» diýlip yglan edildi. Prezident Serdar Berdimuhamedow Hökümetiň tamamlanyp barýan şu ýyldaky ahyrky mejlisinde Türkmenistanyň Mejlisiniň degişli teklibini goldady.
2. Türkmenistanyň Prezidenti Serdar Berdimuhamedow Hökümetiň giňişleýin mejlisinde Täze ýyl agşamy tertip-düzgüniň pugta berjaý edilmegini gözegçilikde saklamagy tabşyrdy. Döwlet Baştutany ähli gulluklarda nobatçylyk tertibiniň ýola goýulmagynyň, jemagat hojalygy, elektrik we suw üpjünçilik gulluklarynyň, hassahanalaryň, dükanlaryň bökdençsiz işledilmeginiň möhümdigini nygtady. Türkmenistanyň Prezidenti raýatlarymyzyň gowy dynç alyp, Täze ýyly ýokary derejede belläp geçmekleri üçin bu çäreleriň zerurdygyny aýtdy
3. Türkmenistanyň Prezidenti Magtymguly Pyragy baradaky täze kitabyny ýazyp tamamlady. Döwlet Baştutany öz eserinde beýik söz ussadynyň edebi mirasynyň, dünýä medeniýetine goşan ägirt uly goşandynyň, şahyryň doglan gününiň 300 ýyllygy bilen bagly geçirilen çäreleriň giňden beýan edilýändigini belledi. Prezident Serdar Berdimuhamedow kitapda Türkmenistanyň gazanan üstünlikleriniň jeminiň jemlenýändigini we onuň türkmen halkyna mynasyp sowgat boljakdygyny aýtdy.
4. Täze ýylyň öňüsyrasynda Gyşky sport görnüşleri sport toplumynyň meýdançasynda zehinli aýdymçy we sazanda Arsen Şahunsyň konserti boldy. Aýdymçy, özüniň meşhur we söýülýän aýdymlaryny ýerine ýetirip, baýramçylyk we şatlyk gurşawyny döretdi. Türkmen halkynyň Milli Lideri Gurbanguly Berdimuhamedow tarapyndan döredilen «Öňe, öňe, diňe öňe, jan Watanym Türkmenistan!» aýdymy aýratyn ünsi çekdi.
5. Türkmenistanda jemgyýetçilik ulaglarynyň Täze ýyl baýramy günleriniň iş tertibi çap edildi. Täze ýylyň öňüsyrasynda şäher ugurlary boýunça awtobuslaryň hereketi şu tertip boýunça amala aşyrylar: 2024-nji ýylyň 31-nji dekabrynda sagat 6:00-dan 2025-nji ýylyň 1-nji ýanwarynda sagat 2:00-a çenli. Şeýle hem taksileriň işi gije-gündiz düzgüninde guralar. Awtobus gatnawlary Aşgabat, Arkadag, Balkanabat, Türkmenbaşy, Daşoguz, Türkmenabat we Mary şäherlerinde doly derejede üpjün ediler.
6. Özbegistanyň paýtagtynda Türkmenistanyň ilçihanasynyň işgärleri üçin niýetlenen 3 gatly ýaşaýyş jaýynyň açylyş dabarasy geçirildi. Häzirki zaman ýaşaýyş jaýynda ýerleşdirilişi has gowulandyrylan, mebeller, döwrebap aşhana we howa ýagdaýyny üpjün edýän ulgamlar bilen üpjün edilen 12 sany öý ýerleşýär. Açylyş dabarasyna daşary işler ministriniň orunbasary Ahemt Gurbanowyň ýolbaşçylygyndaky Türkmenistanyň wekiliýeti gatnaşdy.
Dünýäde
7. Hindistan onlarça ýyl bäri görlüp-eşidilmedik sowuk howany başdan geçirýär. Aýratyn-da, Kaşmirde ýagdaý has agyr, bu ýerde Dal köli uzak wagtyň dowamynda ilkinji gezek doňdy. Ýerli ýaşaýjylar gaýyklaryny buz tutmagyndan azat etmek we doňan suwuň üstünden geçmek üçin köp tagalla etmeli bolýarlar. Adamlar ýylynmak üçin şäheriň köçelerinde ot ýakýarlar. Gyşky eşiklere we ýorganlara, şeýle hem ýerli ilatyň ýylylygy saklamak üçin ulanýan içi gyzgyn külli sebetlerine bolan isleg ep-esli artdy.
Sport habarlary
8. Madridiň «Realynyň» braziliýaly hüjümçisi Winisius Žunior «Globe Soccer Awards» tarapyndan ýylyň futbolçysy diýlip ykrar edildi. Baýrak gowşurylyş dabarasy Dubaýda geçirildi. 2010-njy ýylda döredilen bu baýrak her ýyl görnükli futbolçylara we tälimçilere gowşurylýar. Geçen ýyl bu baýragy Kilian Mbappe aldy.
