Prezident Serdar Berdimuhamedow welaýatlaryň we Aşgabat şäheriniň häkimleriniň hem gatnaşmagynda Ministrler Kabinetiniň we Döwlet howpsuzlyk geňeşiniň giňişleýin mejlisini geçirdi.

Onda, ilki bilen, Türkmenistanyň Mejlisiniň Başlygy D.Gulmanowa 2025-nji ýylyň şygaryny we nyşanyny kesgitlemek boýunça ýerine ýetirilen işleriň netijeleri barada maglumat berdi. Şunuň bilen baglylykda, ol Türkmenistanyň Mejlisiniň degişli Kararyny okady.

Bellenilişi ýaly, 2025-nji ýyly döwrebap atlandyrmak bilen baglanyşykly geçirilen işleriň netijesinde, Türkmenistanyň Halk Maslahatynyň wekillerinden, ýurduň iri jemgyýetçilik birleşiklerinden, zähmetkeş toparlaryndan we raýatlaryndan gelip gowşan teklipleriň hem-de türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedowyň «Türkmenistan — parahatçylygyň we ynanyşmagyň Watany» atly ajaýyp goşgusynyň esasynda we Gahryman Arkadagyň gymmatly maslahatlaryna eýerip hem-de Türkmenistanyň başlangyjy bilen BMG-niň Baş Assambleýasy tarapyndan «2025-nji ýyl — Halkara parahatçylyk we ynanyşmak ýyly» atly Kararnamanyň biragyzdan kabul edilmegi mynasybetli, 2025-nji ýyly «Halkara parahatçylyk we ynanyşmak ýyly» diýip atlandyrmak barada Mejlisiň Karary taýýarlanyldy.

Milli parlamentiň ýolbaşçysy döwlet Baştutanynyň garamagyna geljek ýylyň nyşanyny hem hödürledi.

Prezident Serdar Berdimuhamedow mejlise gatnaşyjylara ýüzlenip, ýurtda her ýyly döwrebap atlandyrmak boýunça ýylyň şygarynyň yglan edilýändigini we nyşanynyň kabul edilýändigini belledi.

Döwlet Baştutany Türkmenistanyň Mejlisiniň agzalarynyň halk köpçüligi bilen bilelikde geljek ýylyň şygaryny hem-de nyşanyny teklip edýändiklerini belledi we bu teklibi goldap, 2025-nji ýylyň şygaryny «Halkara parahatçylyk we ynanyşmak ýyly» diýip yglan etdi. Bu çözgüt şowhunly el çarpyşmalar bilen garşylanyldy.

Prezident Serdar Berdimuhamedow Halkara parahatçylyk we ynanyşmak ýylynda Garaşsyz Türkmenistanyň hemişelik Bitaraplygynyň 30 ýyllyk baýramynyň giňden bellenilip geçiljekdigini, bu şanly sene mynasybetli Türkmenistanda we dünýä ýurtlarynda birnäçe halkara çäreleri geçirmegiň meýilleşdirilýändigini aýtdy.

Döwlet Baştutany Halkara parahatçylyk we ynanyşmak ýyly mynasybetli dabaralary we çäreleri ýokary derejede geçirmek boýunça Guramaçylyk döwlet toparynyň döredilendigini nygtap, oňa Halk Maslahatynyň ýolbaşçylyk etmeginiň maksadalaýyk boljakdygyny belledi hem-de Halkara parahatçylyk we ynanyşmak ýyly bilen baglanyşykly çäreleri ýokary derejede geçirmek üçin ähli tagallalaryň ediljekdigini aýtdy. Bu barada "Watan" habarlar gepleşiginde habar berildi.