24-nji dekabrda Türkmenistanyň daşary işler ministriniň orunbasary Ahmet Gurbanow bilen Türkmenistandaky wezipesini tamamlaýan Belarus Respublikasynyň Türkmenistandaky Adatdan daşary we Doly ygtyýarly ilçisi Wýaçeslaw Beskostyň arasynda duşuşyk geçirildi.
Türkmenistanyň DIM-inde geçirilen duşuşygyň dowamynda taraplar iki ýurduň arasynda däp bolan dostlukly gatnaşyklaryň ýokary derejesini bellediler. Şeýle-de syýasy-diplomatik, söwda-ykdysady we medeni-ynsanperwer ugurlarda hyzmatdaşlygy ösdürmegiň wajyp meseleleri we geljegi ara alnyp maslahatlaşyldy.
Türkmenistanyň daşary syýasat edarasynyň metbugat gullugynyň habar bermegine görä, diplomatlar halkara we sebit gurluşlarynyň çäginde Türkmenistan bilen Belarusyň arasyndaky konstruktiw gatnaşyklaryň dowam etdirilmeginiň möhümdigini kanagatlanma bilen bellediler.
Duşuşygyň barşynda Belarus Respublikasynyň Türkmenistandaky ilçisi Wýaçeslaw Beskostynyň türkmen-belarus gatnaşyklarynyň ösmeginde mynasyp şahsy goşandynyň bardygy nygtaldy.
Türkmenistanyň daşary işler ministriniň orunbasary diplomatyň işinde täze üstünlikleri arzuw etdi.
