2024-nji ýylda Türkmen oba hojalyk instituty «UI GreenMetric World University Ranking» reýtinginde 726-njy orny eýeledi. Bu reýting ýokary okuw mekdepleriniň daşky gurşawy goramak, energetika, howanyň üýtgemegi, galyndylary dolandyrmak, ulag we durnukly ösüş babatdaky gazananlaryny bahalandyrýar. Bu ýyl reýtinge dünýäniň 95 döwletinden 1477 ýokary okuw mekdebi gatnaşdy – diýip, institutyň ylym bölüminiň hünärmeni «Türkmenportal» internet neşirine habar berdi.
«UI GreenMetric World University Ranking» ýokary okuw mekdeplerine durnukly ösüş maksatlaryna esaslanýan birnäçe görkeziji boýunça baha berýär. Hususan-da, ol ýokary okuw mekdebiniň infrastrukturasyny, howanyň üýtgemegini, energiýany, galyndylary, suwy, ulagy, ylmyň we gözlegleriň alnyp barlyşyny göz öňünde tutýar. Türkmen oba hojalyk institutynda bu ugurlar boýunça netijeli ylmy-gözleg işleri alnyp barylýar, bu bolsa institutyň halkara reýtingde mynasyp orny eýelemegine mümkinçilik berdi.
Şeýle hem bu abraýly reýtinge Türkmenistanyň 11 sany ýokary okuw mekdebiniň girendigi bellenmäge mynasypdyr. Şeýle reýtinglere işjeň gatnaşmagy ýurdumyzyň ýokary okuw mekdepleriniň halkara abraýyny ýokarlandyrýar, talyplaryň bilim derejesiniň ýokarlandyrylmagyna, olaryň ylmy-gözleg işlerine bolan gyzyklanmalaryny artdyrmaga we durnukly ösüş maksatlaryna ýetmäge ýardam edýär.
