Ozal habar berşimiz ýaly, türkmen halkynyň Milli Lideri, Türkmenistanyň Halk Maslahatynyň Başlygy, Hormatly il ýaşulusy Gurbanguly Berdimuhamedow Arkadag şäherine iş saparyny amala aşyrdy. Iş saparynyň barşynda Gahryman Arkadag täze şäheriň mynasyp bolan halkara güwänamalary we bu ýerde gurulmagy hem-de durky täzelenmegi meýilleşdirilýän desgalaryň şekil taslamalary bilen tanyşdy, şeýle hem degişli ýolbaşçylaryň gatnaşmagynda iş maslahatyny geçirdi.

TDH-niň habar berşi ýaly, iş maslahatynyň barşynda Türkmenistanyň Prezidentiniň ýanyndaky Arkadag şäheriniň gurluşygy boýunça döwlet komitetiniň başlygy D.Orazow Arkadag şäheriniň ýörite wekiliýetiniň Awstriýanyň Wena şäherine iş saparyna gidip, ol ýerde Arkadag şäheriniň Ýewropanyň Hil barlaglary boýunça jemgyýetiniň hil boýunça baýragyna mynasyp bolan sylagyny we güwänamalary alyp gelmäge döredilen mümkinçilik üçin Türkmenistanyň Prezidentine we Halk Maslahatynyň Başlygyna hoşallyk bildirdi. Şeýle hem ol täze şäheriň binagärlik we ekologiýa derejesi mynasybetli gowşurylan baýragy hem-de degişli güwänamalary görkezip, Gahryman Arkadagy täze şäheriň ikinji tapgyrynda gurulýan lukmançylyk klasteriniň önümleriniň we ösüşiniň halkara derejede ykrar edilýändigini aňladýan bu çözgüt bilen gutlady.

Türkmen halkynyň Milli Lideri täze şäheriň halkara baýraklara we güwänamalara mynasyp bolmagynyň ýurtda hormatly Prezidentiň ýolbaşçylygynda gazanylýan üstünlikleriň halkara derejede ykrar edilýändigini aňladýandygyny belledi. Aýratyn-da, Arkadag şäheriniň lukmançylyk klasteriniň önümleriniň halkara derejede hasaba alynmagy, Intellektual eýeçiligiň Bütindünýä guramasynyň Halkara býurosynyň ýörite güwänamasy arkaly Arkadag şäheriniň lukmançylyk klasteriniň önümleriniň harytlyk nyşanlarynyň tassyklanylmagy ägirt uly ösüşdir.

Şeýle hem Arkadag şäherine döwrüň beýik gudraty derejesiniň we täze şähere hil dolandyryş ulgamynda öňe sürülýän başlangyçlar we gazanylýan üstünlikler netijesinde Arkadag şäheri «Hil saýlawy – 2024» nyşany bolan «Daimond» (Göwher) derejesi berildi.

"Munuň özi lukmançylyk klasteriniň saglygy goraýşa degişli serişdeleriniň, çagalar iýmitleriniň, zyýansyzlandyryş sargylarynyň we stomatologiýa ulgamyna degişli önümleriň hil derejesiniň halkara tassyklanmasydyr" diýip, Gahryman Arkadag belledi.