Türkmenistanda Nebitgaz senagaty we geologiýa işgärleriniň güni bellenilýär, Serdar Berdimuhamedow Ermenistanyň we Özbegistanyň ilçilerinden ynanç hatyny kabul etdi, Aşgabatda «Iran Agrofood» atly oba hojalygynyň halkara sergisi geçiriler we beýleki habarlar
Türkmenistanda
1. Şu gün Türkmenistanda Nebitgaz senagaty we geologiýa işgärleriniň güni bellenilýär. Bu hünär baýramy mynasybetli Prezident Serdar Berdimuhamedow pudagyň işgärlerine Gutlag hatyny iberdi. «Sizi Garaşsyz, hemişelik Bitarap Watanymyzda giňden bellenilýän Nebitgaz senagaty we geologiýa işgärleriniň güni bilen tüýs ýürekden gutlaýaryn. Siziň yhlasly we tutanýerli zähmetiňiziň netijesinde ykdysadyýetimiziň nebitgaz pudagynda uly üstünlikler gazanylýar» diýip, döwlet Baştutany belledi.
2. Prezident Serdar Berdimuhamedow Ermenistan Respublikasynyň Türkmenistanda täze bellenilen Adatdan daşary we Doly ygtyýarly ilçisi Arsen Awagýandan ynanç hatyny kabul etdi. Duşuşygyň barşynda diplomat Ermenistanyň Prezidenti Waagn Haçaturýanyň we Premýer-ministri Nikol Paşinýanyň mähirli salamyny, türkmen halkyna iberen iň gowy arzuwlaryny ýetirdi, şeýle hem türkmen-ermeni gatnaşyklarynyň ähmiýetini we ýokary derejesini belledi.
3. Prezident Serdar Berdimuhamedow Özbegistan Respublikasynyň Türkmenistandaky Adatdan daşary we Doly ygtyýarly ilçisi wezipesine täze bellenilen Rawşanbek Alimowdan ynanç hatyny kabul etdi. Duşuşygyň barşynda diplomat Özbegistanyň Prezidenti Şawkat Mirziýoýewiň mähirli salamyny we iň gowy arzuwlaryny ýetirdi hem-de dost-doganlyga esaslanýan türkmen-özbek gatnaşyklarynyň ähmiýetini belledi.
4. Türkmenistan oba hojalygynda ýylyň iň uly möçberli halkara çäresine öwrüljek – «Iran Agrofood» atly 16-njy halkara ýöriteleşdirilen sergisini geçirmäge taýýarlyk görýär. Ol 16-18-nji dekabr aralygynda Aşgabatda geçiriler. Çäre oba hojalyk pudagyndaky öňdebaryjy tehnologiýalary görkezmek üçin möhüm halkara meýdançasyna öwrüler. Sergi häzirki zaman agrosenagat toplumynyň innowasion çözgütleriniň giň möçberini hödürlär.
5. Türkmenistanyň Prezidenti Serdar Berdimuhamedow degişli Karara gol çekip, Türkmen-ýapon ykdysady komitetiniň türkmen böleginiň düzümini tassyklady. Resminama Türkmenistan bilen Ýaponiýanyň arasynda gazanylan ikitaraplaýyn ylalaşyklary durmuşa geçirmek hem-de iki ýurduň özara gatnaşyklaryny mundan beýläk-de ösdürmek maksady bilen gol çekildi.
6. «Alba» döredijilik topary 2024-nji ýylyň dabaraly jemlemesine taýýarlyk görýär — ol meşhur Aladdin hakynda ertekä esaslanýan «Arap gijesi» atly sazly sahna oýnunyň ahyrky görkezilişi bolar. Tomaşaçylara simfonik orkestriň, hor toparynyň we tansçylaryň gatnaşmagynda şüweleňli sahna oýny garaşýar. Bu şüweleňli sahna oýny maşgala bolup tomaşa etmek üçin niýetlenendir. Şüweleňli tomaşa 18-nji dekabrda sagat 19:00-da «Arkaç» söwda merkeziniň «Bahar» toý zalynda bolar.
7. Russiýanyň häkimiýetleri agajyň üstaşyr daşalmagy babatda täze düzgünleri girizýär, oňa laýyklykda, ähli awtoulag daşaýjylaryndan, şol sanda türkmen awtoulag daşaýjylaryndan hökmany suratda «GLONASS» hemra nawigasiýa enjamynyň ornaşdyrylmagy talap ediler. Täze düzgünleri berjaý etmedikleri administratiw jogapkärçiligine çekmek göz öňünde tutulýar. Täze düzgünler 2025-nji ýylyň 1-nji ýanwaryndan güýje girýär.
Dünýäde
8. Miçiganly alymlar tarapyndan geçirilen gözlegde hot-dog iýmitiniň kola bilen iýilmeginiň adamyň ömrüni bir sagada golaý gysgaldýandygy anyklandy. Hünärmenler ABŞ-da öndürilen 6000 töweregi azyk önümini seljerip, olaryň düzümindäki goşundylaryň, ýaglaryň, kaloriýalaryň we şekeriň möçberine baglylykda, bedene ýetirip biljek täsirine baha berdiler. Iň uly görkezijä hot-dog bilen gazlandyrylan içgiler eýe boldy. Alnan maglumatlara görä, şular ýaly naharlaryň bir gezek iýilmegi ömrüň dowamlylygyny bir sagada golaý azaldýar: hot-dog 36 minut, süýji gazlandyrylan içgi bolsa 12 minut «alýar». Mundan başga-da, gözlegçiler beýleki meşhur iýmitler üçin şuňa meňzeş netijeleri ýüze çykardylar: bekon ömri 6 minut, çizburger bolsa 9 minut gysgaldýar. Alymlar gaýtadan işlenen etden alynýan kaloriýanyň 10%-ini miwe we gök önümler bilen çalyşmagyň hot-dog we gazlandyrylan içgi sebäpli ýitirilen ömrüň 48 minudynyň öwezini dolup boljakdygyny aýdýarlar.
Sport täzelikleri
9. Bahreýniň paýtagtynda geçirilýän agyr atletika boýunça dünýä çempionatynda Dawranbek Hasanbaýew 102 kilograma çenli agram derejesinde Türkmenistana kiçi bürünç medal getirdi. Türgen 182 kg agramly ştangany göterdi. Şeýle-de bolsa, ikinji tapgyrda – itekläp götermekde Hasanbaýew üç synanyşygynyň hiç birini ýerine ýetirip bilmedi we ýaryşy nol hasap bilen tamamlady. Bu agram derejesinde iki tapgyrda jemi 400 kg netije görkezen gazagystanly Artýom Antropow altyn medala mynasyp boldy.
