Gurbanguly Berdimuhamedow «Magtymguly Pyragynyň 300 ýyllygyna» ýubileý medaly bilen sylaglandy, Türkmenistanyň Prezidenti BMG-niň wekili Natalýa German bilen halkara hukuk tertibini berkitmegi ara alyp maslahatlaşdy, Binali Ýyldyryma Türkmenistanyň «Hormatly il ýaşulusy» diýen ady dakyldy we beýleki habarlar
Türkmenistanda
1. Türkmenistanyň Prezidenti Serdar Berdimuhamedow türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedowy «Magtymguly Pyragynyň 300 ýyllygyna» atly ýubileý medaly bilen sylaglamak hakynda Permana gol çekdi. Bu sylag ýurtda maksatnamalaýyn özgertmeleri durmuşa geçirmekde, dünýä döwletleri, halkara guramalar bilen medeni-ynsanperwer gatnaşyklary täze derejä çykarmakda, halklaryň arasynda parahatçylyk, dost-doganlyk köprülerini gurmakda bitiren hyzmatlary göz öňünde tutulyp gowşuryldy. Mundan başga-da, döwlet Baştutany türkmen halkynyň Milli Liderine Magtymguly adyndaky halkara baýragyny berdi.
2. Prezident Serdar Berdimuhamedow Türki Döwletleriň Guramasynyň Aksakgallar geňeşiniň başlygy Binali Ýyldyryma «Hormatly il ýaşulusy» diýen hormatly ady dakdy. Mundan başga-da, Binali Ýyldyrym türkmen edebiýatynyň nusgawy şahyrynyň döredijilik mirasyny wagyz etmekde goşan uly şahsy goşandy nazara alnyp, «Magtymguly Pyragynyň 300 ýyllygyna» atly ýubileý medaly bilen sylaglandy.
3. Prezident Serdar Berdimuhamedow BMG-niň Howpsuzlyk geňeşiniň Terrorçylyga garşy göreşmek boýunça komitetiniň Ýerine ýetiriji direktoratynyň Ýerine ýetiriji direktory Natalýa German bilen duşuşdy. Söhbetdeşligiň dowamynda halkara hukuk tertibini berkitmek we ählumumy dolandyryşyň köppolýarly ulgamyny ösdürmek meseleleri ara alnyp maslahatlaşyldy.
4. Aşgabatda dabaraly ýagdaýda döwrebaplaşdyrylan «Ak ýol» söwda bazary açyldy, durky täzelenen söwda toplumynyň meýdany takmynan 11 000 inedördül metr. Täze söwda toplumy öz möçberiniň ululygy we mümkinçilikleri bilen bazara gelýänlerde täsir galdyrýar. Söwda bazary iki gatdan ybarat bolup, ol ýerde 284 söwda dükany ýerleşýär, şeýle hem söwda toplumynda satyjylaryň harytlaryny saklamak üçin iki ambar we sowadyjy otaglar bar. Durky täzelenen «Ak ýol» bazarynyň esasy artykmaçlygy bu söwda toplumynda harytlaryň giň görnüşiniň bolmagydyr. Bu ýerde ýerli öndürijileriň egin-eşiklerini, täze azyk önümleri, süýji önümleri we aýratyn möwsümleýin harytlary, şol sanda täze ýyla niýetlenen baýramçylyk sowgatlaryny tapyp bolýar.
5. Aşgabatda Parlament işiniň düzgünleri we guramaçylyk işleri boýunça Komitetiniň başlygy Wýaçeslaw Timçenkonyň ýolbaşçylygyndaky Russiýanyň Federasiýa Geňeşiniň agzalarynyň wekiliýeti sapar bilen boldy. Wekiliýetiň agzalary tejribe alyşmak we iki ýurduň parlamentara hyzmatdaşlygyny berkitmek maksady bilen, Türkmenistanyň Mejlisinde birnäçe duşuşyklary geçirdi. Şeýle hem Russiýanyň senatorlary A.S.Puşkin adyndaky umumy orta bilim berýän bilelikdäki türkmen-rus mekdebiniň işi bilen tanyşdylar.
Dünýäde
6. Norwegiýanyň Oslo şäherinde 2024-nji ýylda Parahatçylyk boýunça Nobel baýragyny gowşurmak geçirildi. Abraýly baýraga Hirosimada we Nagasakide bolan atom partlamalarynda diri galanlary birleşdirýän «Nihon Hidanke» ýapon guramasy mynasyp boldy. Dabara hemişe bolşy ýaly 10-njy dekabrda – Alfred Nobeliň aradan çykan senesinde, Norwegiýanyň patyşa maşgalasynyň wekilleriniň gatnaşmagynda şäher häkimliginde geçirildi.
7. Awstraliýanyň Kwinslend ştatynda biologiýa howpsuzlygy protokollarynyň çynlakaý bozulmagy bilen baglanyşykly dawa ýüze çykdy. Ýerli ýolbaşçylar ylmy barlaghanadan köp sanly wirus nusgalarynyň syrly ýagdaýda ýitirim bolmagyndan soň derňew işine başladylar. 2023-nji ýylyň awgust aýynda bolup geçen bu waka ýaňy-ýakynda mälim boldy. Mümkin bolup biljek ölüm howply wiruslary bolan 323 ampula, seýrek we aýratyn howply ştamlar ylmy edaradan dereksiz ýitdi.
Sport täzelikleri
8. Türkmenistanyň Nebitgaz senagaty we geologiýa işgärleriniň güni mynasybetli Balkanabatda türkmen sport weteranlarynyň we žurnalistleriniň gatnaşmagynda kiçi futbol oýny geçirildi. Balkan welaýatynyň we Aşgabat şäheriniň ýygyndy toparlarynyň arasyndaky ýoldaşlyk duşuşygy 3:3 hasabynda tamamlandy. Balkan welaýatynyň ýygyndysynyň düzüminde Ýewgeniý Tkaçenko iki gol bilen tapawutlandy, ýene bir goly Azat Garajaýew geçirdi. Paýtagtyň toparynyň düzüminde Nazar Baýramow iki gol, Wladimir Baýramow bir gol geçirdi.
9. 12 we 13-nji dekabrda Türkmenistanyň futbol boýunça Kubogynyň ilkinji ýarym finalynyň oýunlary geçiriler. 12-nji dekabrda, penşenbe güni, «Nebitçi» Balkanabatda öz meýdançasynda «Arkadag» toparyny kabul eder. Oýnuň başlanýan wagty – ýerli wagt bilen 14:00-da. Ertesi güni, 13-nji dekabrda Aşgabatda «Ahal» topary «Altyn Asyr» bilen duşuşar, oýun «Nusaý» stadionynda 15:00-da başlar.
