Bitaraplyk güni mynasybetli Türkmenistanyň Prezidenti tussag edilen 276 adamyň günäsini geçdi, Türkmenistanyň Prezidenti we ýurduň ýolbaşçylar düzümi «Magtymguly Pyragynyň 300 ýyllygyna» atly ýubileý medaly bilen sylaglandy, türkmen türgeni agyr atletika boýunça dünýä çempionatynda kiçi kümüş medal gazandy we beýleki habarlar
Türkmenistanda
1. Prezident Serdar Berdimuhamedow jenaýat eden we etmişlerine ökünip, ak ýürekden toba gelen 276 sany tussag edilen raýatyň günäsini geçdi. Degişli Permana ýurduň daşary ýurtlardaky diplomatik wekilhanalarynyň we halkara guramalaryň ýanyndaky wekilhanalarynyň ýolbaşçylarynyň gatnaşmagynda geçirilen Ministrler Kabinetiniň giňişleýin mejlisinde gol çekildi. Günäsi geçilenler azatlykdan mahrum edilmek görnüşinde mundan beýläk jeza çekmekden boşadyldy.
2. Prezident Serdar Berdimuhamedow Türkmenistanyň «Magtymguly Pyragynyň 300 ýyllygyna» atly ýubileý medaly we ýadygärlik nyşanlar toplumy bilen sylaglandy. Türkmenistanyň Konstitusiýasynyň 81-nji maddasyna esaslanyp, Türkmenistanyň Mejlisi degişli karar kabul etdi. Prezident Serdar Berdimuhamedowa ýubileý medalyny gowşurmak dabarasy duşenbe güni Ministrler Kabinetiniň giňişleýin mejlisi tamamlanandan soňra «Oguz han» köşkler toplumynda geçirildi.
3. Türkmenistanyň Prezidenti Serdar Berdimuhamedow Hökümetiň agzalaryny Türkmenistanyň «Magtymguly Pyragynyň 300 ýyllygyna» atly ýubileý medaly bilen sylaglamak hakynda Permana gol çekdi. Sylaglananlaryň hatarynda Türkmenistanyň Mejlisiniň Başlygy, Ministrler Kabinetiniň Başlygynyň orunbasarlary, Ministrler Kabinetiniň ýanyndaky Ulag we kommunikasiýalar agentliginiň Baş direktory, şeýle hem ýurdumyzyň harby we hukuk goraýjy edaralarynyň ýolbaşçylary bar.
4. BMG-niň Baş sekretarynyň kanunyň hökmürowanlygy we howpsuzlyk edaralary boýunça kömekçisi Aleksandr Zuýew «Halkara parahatçylygy we durnukly ösüşi pugtalandyrmakda bilelikdäki tagallalar» atly halkara maslahata hem-de Halkara Bitaraplyk gününe bagyşlanan çärelere gatnaşmak üçin Aşgabada sapar bilen geldi. Duşenbe güni Türkmenistanyň DIM-inde onuň daşary işler ministri Raşid Meredow bilen duşuşygy boldy.
5. Türkmenistanyň Prezidenti Serdar Berdimuhamedow ýurduň diplomatik gullugynyň maliýe meseleleri hakynda Karara gol çekdi. Resminama Türkmenistanyň daşary ýurt döwletlerindäki diplomatik wekilhanalarynyň we konsullyk edaralarynyň işini kämilleşdirmek maksady bilen gol çekildi.
Dünýäde
6. «Microsoft-yň» esaslandyryjysy we ozalky baş direktory Bill Geýts häzirki zaman enjamlarynyň we sosial ulgamlaryň ýaş nesillerde çuňňur pikirlenmäniň ösmegini çäklendirip biljekdigine alada bildirdi. Geýts häzirki wagtda smartfonlar bilen gyzyklanýan çagalar ýaly ulalan bolsa, milliarder boljakdygyna şübhelenýär. Onuň bellemegine görä, onuň töweregindäki dünýäni öwrenmek we okamak üçin sarp eden çagalygy häzirki wagtda 3,26 trillion dollar bahasy bolan kompaniýany esaslandyrmaga mümkinçilik berdi.
7. Haýwanlaryň hukuklaryny goraýan PETA guramasy «Nosferatu» filmini tankytlap, Robert Eggersi alakalara töhmet atmakda aýyplady. Haýwanlaryň hukuklaryny goraýjylar režissýoryň täze filminde bu haýwanlaryň mergi keselini göterijiler hökmünde görkezilmegi bilen ylalaşmaýarlar. Olaryň pikiriçe, şeýle garaýyş diňe bir adalatsyz bolman, eýsem, tomaşaçylary alakalary hakykatdan-da boluşlary ýaly: akylly, ýakymly we wepaly jandarlar hökmünde görmek mümkinçiliginden mahrum edýär.
Sport täzelikleri
8. Türkmen türgeni Bunýad Raşidow Manama şäherinde geçirilýän agyr atletika boýunça dünýä çempionatynda silkip götermekde kümüş medal gazandy. Ol bu sylagyny 73 kg çenli agram derejesinde medal ugrunda oňa bäsdeş bolan 26 türgenden üstün çykyp, gazanmagy başardy. Silkip götermekde Raşidow 154 kg netije görkezdi. Emma ol itekläp götermekde 16-njy netijäni görkezdi we netijede, 15-nji orny eýeledi. ünýä çempiony adyna iki tapgyrda jemi 349 kg netije bilen KHDR-den Hýon Ri Rýon mynasyp boldy.
9. «Arkadag» futbol toparynyň futbolçylary Türkmenistanyň çempionatynyň 27-nji tapgyrynyň yza süýşürilen oýnunda myhmançylykda «Altyn Asyry» 4:0 hasabynda ýeňdiler. «Arkadag» Türkmenistanyň çempionatynda möwsümi yzly-yzyna ikinji ýyl 100% netije bilen tamamlady. Wladimir Baýramowyň şägirtleri ýurduň çempionatynda ýekeje oýunda-da ýeňilmediler. Toparyň ýene-de iki baýrak – Türkmenistanyň Kubogyny we AFK-nyň Çagyryş ligasynyň çempionlygyny eýelemek mümkinçiligi bar. «Ahal» Türkmenistanyň çempionatynyň tamamlanmagyna bir tapgyr galanda ikinji, «Altyn Asyr» bolsa üçünji orny eýeledi.
