Türkmenistanyň Prezidenti «Türkmenenergo» korporasiýasyna Owganystana elektrik energiýasyny ibermek baradaky şertnamany uzaltmaga rugsat berdi, Arkadagda Gurbanguly Berdimuhamedow adyndaky Haýyr-sahawat gaznasynyň müdiriýetiniň mejlisi geçirildi, Türkmenistanyň agyr atletikaçylary Manamada geçiriljek dünýä çempionatynda çykyş edýärler we beýleki habarlar

Türkmenistanda

1. Türkmenistanyň Prezidenti Serdar Berdimuhamedow Türkmenistanyň Energetika ministrliginiň «Türkmenenergo» döwlet elektroenergetika korporasiýasyna Türkmenistandan Owganystana elektrik energiýasyny ibermek barada Owganystanyň «DABS» kompaniýasy bilen goşmaça ylalaşyklary baglaşmaga ygtyýar bermek hakynda Karara gol çekdi. Resminama türkmen elektrik energiýasyny daşary ýurtlara ibermek baradaky meýilnamalary ýerine ýetirmek, şeýle hem Türkmenistan bilen Owganystanyň arasynda elektrik energetikasy pudagynda alnyp barylýan hyzmatdaşlygy dowam etdirmek maksady bilen kabul edildi.

2. Arkadag şäherinde Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň müdiriýetiniň mejlisi geçirildi. Mejlisiň gün tertibine Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasy tarapyndan alnyp barylan işleriň jemini jemlemek; kanunçylyk hukuk namalaryna girizilen üýtgetmeler; Haýyr-sahawat gaznasynyň serişdeleriniň sarp edilişi; Gurbanguly Berdimuhamedow adyndaky çagalar sagaldyş-dikeldiş merkezi tarapyndan şu ýylda alnyp barlan işleriň jemi we beýleki meseleler girizildi. Gaznanyň wise-prezidenti R.Bazarow geçen döwürde ýerine ýetirilen işler we öňde durýan wezipeler barada hasabat berdi. Ol Haýyr-sahawat gaznasynyň serişdeleriniň hasabyna näsag çagalara jemi 500-den gowrak, diňe şu ýylyň özünde 261 sany operasiýalaryň geçirilendigi, saglygy goraýyş-öňüni alyş barlaglarynyň amala aşyrylandygy we çagalaryň saglygy goraýyş maksatly serişdeler bilen üpjün edilendigi barada aýtdy.

3. Türkmenistanyň Prezidenti Serdar Berdimuhamedow Eýranyň energetika ministri Abbas Ali Abadini we Merkezi bankynyň başlygy Mohammadreza Farzin bilen duşuşyk geçirdi. Duşuşygyň dowamynda nebitgaz pudagyndaky ikitaraplaýyn hyzmatdaşlygy pugtalandyrmagyň we energiýa serişdelerini dünýä bazarlaryna ibermegiň ugurlaryny diwersifikasiýa ýoly bilen ösdürmegiň meseleleri ara alnyp maslahatlaşyldy.

4. Türkmenistanyň Mukaddes Tagtdaky täze ilçisi Wepa Hajiýew Rima Papasy Fransiske ynanç hatlaryny gowşurdy. Rim Papasy global kynçylyklary çözmekde diplomatiýanyň esasy ornuny nygtady we Mukaddes Tagtyň «oňyn bitaraplyk» ýörelgesine ygrarlydygyny aýdyp, meseleleri çözmekde umytly we döredijilikli bolmaga çagyrdy. Gysga söhbetdeşligiň başynda ilçi Wepa Hajiýew Rim Papasyna türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedowyň hem-de Türkmenistanyň Prezidenti Serdar Berdimuhamedowyň ýollan salamlaryny hem-de iň gowy arzuwlaryny ýetirdi.

5. Seulda geçirilen «Merkezi Aziýa — Koreýa Respublikasy» dostluk gününiň bellenilmeginiň dowamynda Türkmenistanyň syýahatçylyk mümkinçilikleri bilen tanyşdyryldy. Çäräniň çäklerinde Merkezi Aziýanyň miras we syýahatçylyk akademiki konferensiýasynyň ýörite sessiýasy geçirildi. Oňa Merkezi Aziýa ýurtlarynyň ilçileri, akademiki toparlaryň wekilleri we bilermenler gatnaşdylar. Ýygnananlar medeni alyşmalaryň, syýahatçylykda hyzmatdaşlygy pugtalandyrmagyň mümkinçilikleri, sebitiň täsin medeni mirasyny gorap saklamagyň ýollary barada pikir alyşdylar.

Dünýäde

6. «Toyota» kompaniýasy tarapyndan işlenip düzülen «CUE6» atly adampisint roboty basketbol topuny 24,55 metr aralykdan halka girizip, bu ugurda täze dünýä rekordyny goýdy. Bu netijä garamazdan, robot henizem adamyň 34,6 metr aralykdan goýan rekordyndan öňe geçip bilmedi. «CUE6» bu üstünligi geçmäge synanyşdy, ýöne top halkadan çykdy. «Toyota» robotynyň Ginnesiň rekordlar kitabyna ikinji gezek girendigini bellemelidiris. 2019-njy ýylda ol 3,6 m aralykdan basketbol topy bilen 2020 gezek takyk gol geçirdi.

7. «ABC» teleýaýlymy «Klinika» atly meşhur sitkomyň gaýtadan ýaýlyma beriljekdigini yglan etdi. Asyl serialy döreden Bill Lourens dowamyň taýýarlanylmagyna gatnaşar. Täze taslama gibrid hökmünde ýerleşdirildi: bir tarapdan tomaşaçylar tanyş gahrymanlary görerler, beýleki tarapdan serialyň konsepsiýasy täzelener. Bil Lourens ozal baş keşpleriň serialyň gaýtadan ýaýlyma berilmegine gatnaşmaga taýýardygyny tassyklady.

Sport täzelikleri

8. Manamada geçirilýän agyr atletika boýunça Dünýä çempionatynda Türkmenistana 8 türgen wekilçilik edýär. Türkmenistanyň erkekler ýygyndysyna 7 ştangaçy türgen, zenanlar ýygyndysyna 2018-nji ýylyň 45 kg çenli agram derejesindäki dünýä çempiony Ýulduz Jumabaýewa girýär.

8. Futbol boýunça Türkmenistanyň ýygyndysy 2027-nji ýylda geçiriljek Aziýa Kubogynyň saýlama tapgyrynda «D» toparçada Taýlandyň, Hytaý Taýbeýiniň we Şri-Lankanyň ýygyndylary bilen oýnar. Saýlama tapgyrynyň bije çekişligi şu gün Kuala-Lumpurda geçirildi. Onuň jemleri boýunça her birinde dört topar bolan alty sany toparça döredildi. Diňe alty saýlama toparyň ýeňijileri Saud Arabystanynda geçiriljek ýaryşyň final bölegine çykarlar.