Türkmenistanyň Prezidenti işgärlere aýlyk zähmet haklaryny 20-nji dekabra çenli tölemegi tabşyrdy, Türkmenistan we Türkiýe gaz pudagyndaky hyzmatdaşlygy ara alyp maslahatlaşdy, Aşgabatda Merkezi Aziýada ýadro ýaragsyz sebiti baradaky şertnamanyň 15 ýyllygy bellenildi we beýleki habarlar
Türkmenistanda
1. Türkmenistanyň Prezidenti Serdar Berdimuhamedow eýeçiliginiň görnüşine garamazdan, ähli edara-kärhanalaryň işgärlerine 20-nji dekabra çenli aýlyk zähmet haklarynyň tölenilişine berk gözegçilik etmegi tabşyrdy. Bu görkezme Ministrler Kabinetiniň nobatdaky mejlisinde berildi.
2. Aşgabatda «Türkmengaz» döwlet konserniniň ýolbaşçylarynyň «BOTAŞ» türk kompaniýasynyň wekiliýeti bilen duşuşygy boldy. Duşuşykda gaz pudagyndaky hyzmatdaşlygyň meseleleri, şol sanda Türkmenistanyň eksport mümkinçilikleriniň artdyrylmagy ara alnyp maslahatlaşyldy. Taraplar iki halkyň bähbidine özara hyzmatdaşlygyň mundan beýläk-de ösdüriljekdigine ynam bildirdiler.
3. Türkmenistanyň Daşary işler ministrliginde «Türkmenistan – BMG» strategik maslahat beriş geňeşiniň nobatdaky mejlisi geçirildi. Onuň dowamynda ileri tutulýan ugurlar boýunça hyzmatdaşlygyň mümkinçilikleri ara alnyp maslahatlaşyldy. BMG-niň wekilleri başlangyçly çemeleşmeleri üçin türkmen tarapyna hoşallyk bildirip, Durnukly ösüş maksatlaryna ýetmäge gönükdirilen täze bilelikdäki täze taslamalaryň we maksatnamalaryň üstünlikli durmuşa geçiriljekdigine ynam bildirdiler.
4. Türkmenistanyň daşary işler ministriniň orunbasary Mähri Bäşimowanyň ýolbaşçylygyndaky Türkmenistanyň wekiliýeti ÝHHG-niň Daşary işler ministrleriniň geňeşiniň 31-nji mejlisine gatnaşdy. Bäşimowa çykyşynda Türkmenistanyň ÝHHG bilen hyzmatdaşlygynyň sebitdäki durnuklylygy berkitmekde, dialogy we durnukly ösüşi pugtalandyrmakda möhüm ähmiýete eýedigini belledi. Türkmenistanyň syýasy, ykdysady-daşky gurşaw we ynsanperwer ugurlardaky başlangyçlaryna aýratyn üns berildi.
5. Türkmenistanyň Prezidenti Arkadag şäheriniň gurluşygy boýunça döwlet komitetiniň başlygynyň ýolbaşçylygyndaky wekiliýeti Awstriýa Respublikasynyň Wena şäherinde gulluk iş saparyna ibermek hakynda Buýruga gol çekdi. Wekiliýet Arkadag şäherine Ýewropanyň Hil barlaglary boýunça jemgyýetiniň hil boýunça baýragynyň gowşurylmagy mynasybetli geçiriljek dabara gatnaşar. Çäre 8 — 10-njy dekabr aralygynda geçiriler.
6. Aşgabatda Beýik Ýüpek ýolunyň Hazarýaka şahalaryny ÝUNESKO-nyň Bütindünýä mirasynyň sanawyna girizmek boýunça halkara bilermenleriň sebitleýin duşuşygy geçirildi. Oňa Hökümet agzalary, milli utgaşdyryjylar we bilermenler gatnaşdylar. Ýüpek ýolunyň Hazar — Wolga geçelgesiniň hödürnamasyny taýýarlamak üçin «Ýol kartasyny» işläp taýýarlamaga, mirasyň obýektlerini gözlemek we dolandyrmak işlerine häzirki zaman tehnologiýalaryny ornaşdyrmaga aýratyn üns çekildi.
7. Türkmenistanyň Prezidenti «Daşary ykdysady gatnaşyklarda puly kadalaşdyrmak we pula gözegçilik etmek hakynda» Türkmenistanyň Kanunyna goşmaça we üýtgetmeler girizmek hakynda» Kanuna gol çekdi. Täze kanun Türkmenistanyň Merkezi banky tarapyndan amala aşyryljak pul amallaryna gözegçiligi girizýär.
Dünýäde
8. Gonkongyň howa menzilinde ýerli haýwanat bagynda iki pandanyň dünýä inmegine bagyşlanan giň gerimli gurnama çäres geçirildi. Uçuş-gonuş zolagynda kauçukdan ýasalan 2500 panda heýkeli oturdyldy. Bu waka «PANDA GO! FEST» festiwalynyň bir bölegi boldy. Festiwalyň çäklerinde gurnama şäheriň dürli ýerlerine göçürilip, Gonkongyň ýaşaýjylaryny we myhmanlaryny pandalar dünýäsi bilen tanyşdyrar.
9. Muhammet ady tiz meşhurlyk gazanýar we häzirki wagtda Angliýada we Uelsde oglanjyklaryň iň meşhur atlarynyň arasynda birinji ýerde durýar. Beýik Britaniýanyň Milli statistika müdirliginiň habaryna görä, 2023-nji ýylda 4600-den gowrak täze doglan oglan Muhammet diýip atlandyryldy. Zenan atlaryň arasynda Oliwiýa sekizinji ýyl bäri birinji orny eýelän lider bolmagynda galýar. Ondan soň Ameliýa we Aýla gelýär.
Sport täzelikleri
10. Futbol boýunça Saud Arabystanynyň çempionatynyň 13-nji tapgyrynda «Al-Nasr» myhmançylykda «Al-Ittihaddan» utuldy. Duşuşyk Jiddada geçirildi we 2:1 hasabynda tamamlandy. «Al Ittihady» Karim Benzema öňe çykardy. «Al-Nasr» Kriştianu Ronaldunyň goly bilen hasaby diňledi. Ýer eýeleriniň ýeňşini Stiwen Bergweýniň takyk urgusy getirdi. Saud Arabystany çempionatynyň şu möwsüminde Ronaldu we Benzema onunjy pökgüsini tora girizdiler. Bombardirleriň sanawynda diňe «Al-Hilalyň» futbolçysy Aleksandar Mitrowiç olardan öňde barýar.
11. Türkmenistanda Awtomobil sport federasiýasy hem-de Bedenterbiýe we sport baradaky döwlet komitetiniň guramagynda ralli-reýd çempionaty geçirildi. Ýaryşa Türkmenistanyň Içeri işler ministrliginiň, «Türkmenawtoulaglary» agentliginiň we Türkmenistanyň Awtomobil sport federasiýasynyň ýygyndy toparlary gatnaşdylar. Uzynlygy 161 km bolan bu ýol Ahal we Balkan welaýatlarynyň çäklerini öz içine alyp, Garagum sährasynyň üstünden geçdi. T2 klasda «Nissan Patrol» ulagyna erk edýän «Türkmenawtoulaglary» agentliginden Merdan Toýlyýew ýeňiji boldy. Açyk klasda bolsa birinji orny «Toyota Hiluх» awtoulagynda Çaryýar Çaryýew eýeledi.
