2 — 20-nji dekabr aralygynda ABŞ-nyň Döwlet Departamentiniň «Halkara okuw saparynyň» (IVLP) çäklerinde guralýan «Ýokary okuw mekdeplerini dolandyrmak: hyzmatdaşlyk we täjirleşdirmek» atly okuwlara gatnaşmak üçin Türkmenistanyň wekiliýeti Amerikanyň Birleşen Ştatlarynda iş saparynda bolýar. Wekiliýetiň düzüminde Magtymguly adyndaky Türkmen döwlet uniwersitetiniň, Halkara ynsanperwer ylymlary we dolandyryş uniwersitetiniň, Türkmenistanyň Telekommunikasiýalar we informatika institutynyň hem-de Milli bilim institutynyň wekilleri bar. Bu barada «Türkmenistan: Altyn asyr» saýtynda habar berildi.

2-nji dekabrda Waşington şäheriniň Halkara bilim institutynyň binasynda Döwlet departamentiniň hünärmeni hanym Çikita Jeksonyň, Halkara bilim institutynyň maksatnama ýolbaşçysy jenap Kris Hilliň we maksatnamanyň utgaşdyryjysy hanym Serra DePalmonyň gatnaşmagynda duşuşyk geçirildi. Onda Türkmenistanyň wekiliýeti üçin guraljak okuwyň mazmuny bilen içgin tanyşdyryldy, okuwlaryň çäklerinde geçiriljek çäreleriň tertibine gatnaşyjylaryň isleglerine görä goşmaçalary girizmegiň mümkinçilikleri ara alnyp maslahatlaşyldy.

Türkmen wekiliýetiniň agzalary wekilçilik edýän edaralarynyň alyp barýan iş ugurlary hem-de geljekde öňde goýlan wezipeler barada amerikan tarapyny giňişleýin tanyşdyrdy.

Soňra Amerika uniwersitetiniň professory Diane Lowenthalyň alyp barmagynda Federalizm barada brifing geçirildi. Onda ABŞ-nyň döwlet dolandyryş ulgamy giňişleýin beýan edildi diýlip, habarda bellenilýär.