Aşgabatda türk harytlarynyň giň gerimli sergisi açyldy, Maşatda geçirilen duşuşykda Türkmenistan YHG-niň çäklerinde hyzmatdaşlyga garaýşyny beýan etdi, Türkmenistanda Gresiýa Respublikasynyň täze ilçisi işe başlady we beýleki habarlar
Türkmenistanda
1. Şu gün Türkmenistanyň Söwda-senagat edarasynda Türkiýe Respublikasynyň eksport harytlarynyň giň gerimli sergisi açyldy. Oňa senagat we hyzmatlar ulgamyna wekilçilik edýän 70-e golaý türk kompaniýasy gatnaşýar. Ýygnananlar Prezident Serdar Berdimuhamedowyň iberen Gutlagyny uly üns bilen diňlediler. Sergi tehnologik we oba hojalyk enjamlaryndan başlap, hojalyk tehnikalaryna we ýuwujy serişdelere çenli köp ugurlary öz içine alýar.
2. Türkmenistanyň daşary işler ministriniň orunbasary A.Gurbanowyň ýolbaşçylygyndaky wekiliýet Maşat şäherinde geçirilen Ykdysady Hyzmatdaşlyk Guramasynyň Daşary işler ministrleriniň Geňeşiniň 28-nji mejlisine gatnaşdy. A.Gurbanow öz çykyşynda Türkmenistanyň YHG-nyň çäginde hyzmatdaşlygyň ileri tutulýan ugurlary boýunça garaýşyny hem-de guramanyň ösüş strategiýasy boýunça tekliplerini hödürlenildi. Hususan-da, ulag we logistika ulgamynda, şeýle hem energetika pudagynda hyzmatdaşlygy ösdürmegiň ähmiýeti bellendi. Önümçilik zynjyrlaryny döretmek, kiçi we orta telekeçilik pudagynda hyzmatdaşlygy ösdürmäge ähmiýet bermek bilen, serhetýaka we sebitleýin söwda mümkinçiliklerinden peýdalanmak arkaly senagat hyzmatdaşlygyny giňeltmegiň ýerlikliligi beýan edildi.
3. Türkmenistanyň Mejlisiniň Başlygy D.Gulmanowa Gresiýa Respublikasynyň Türkmenistanda täze bellenen Adatdan daşary we Doly ygtyýarly ilçisi hanym Ýekaterini Ksagorariden ynanç hatyny kabul etdi. Duşuşygyň barşynda täze ilçi ýurduň içeri we daşary syýasatynyň esasy ugurlary bilen tanyşdyryldy.
4. Halkara ynsanperwer ylymlary we ösüş uniwersitetiniň wekiliýeti Rumyniýada saparda boldy. Saparyň dowamynda Rumyniýanyň inženerçilik tehnologiýasy pudagyndaky iň uly ýokary okuw mekdepleriniň biri bolan Buharestiň Politehniki uniwersitetiniň ýolbaşçylary bilen duşuşyk geçirildi. Duşuşykda Politehniki uniwersitetiniň prorektory Horiýa Nekula bu ýokary okuw mekdebiniň taryhy, gurluşy, akademiki we halkara işleri barada gürüň berdi hem-de türkmen uniwersiteti bilen uzakmöhletleýin hyzmatdaşlygy ýola goýmaga gyzyklanma bildirdi. Taraplar kompýuter tehnologiýasy pudagynda 1+1 ulgamy boýunça goşa diplom maksatnamasynyň taslamasyny taýýarlamagyň mümkinçiliklerini öwrenmegi teklip etdiler.
Dünýäde
5. Şuraf Işida Ýaponiýada gezelenç etmegiň ajaýyp usulyny döretdi, ol adaty bolmadyk we adam gatnaşyklarynyň çuňlugy bilen köpçüligiň ünsüni özüne çekdi. Işini taşlap, şahsy zatlarynyň köpüsinden dynan bu adam ýönekeý alyş-çalyş – biriniň şahsy hekaýasyny diňlemek mümkinçiliginiň deregine bir gije galmagy teklip edip, ýurtda syhaýat edýär. Soňky bäş ýylda Işida gijäni geçirmek üçin ýer tapmagyň ýönekeý, ýöne täsirli usulyny ulanyp, 500-den gowrak öýde gijäni geçirdi. Täze şähere gelip, gije galmak üçin ýaşaýyş jaýyny gözleýändigini beýan edýän ýazgy bilen merkezi meýdança çykýar. Adatça, söhbetdeşlige we ýatlamalaryny paýlaşmak mümkinçiligine begenýän öý eýelerini, köplenç ýalňyz adamlary tapýar.
Sport täzelikleri
6. Şu gün «Altyn Asyr» futbol topary AFK-niň ikinji Çempionlar ligasynyň toparçalaýyn tapgyrynyň altynjy aýlawynda Bahreýniň «Al-Halidiýa» toparyna garşy myhmançylykda duşuşyk geçirer. Oýun Riffadaky Bahreýn milli stadionynda geçiriler we Aşgabat wagty bilen 19:00-da başlar. «Altyn Asyr» gök köýnekçede meýdança çykar. «Al-Halidiýadan» garşydaşlary bolsa sary köýnekçede oýnar. Iki topar hem 2-nji oktýabrda Aşgabatda duşuşdy, şol wagt «Al-Halidiýa» 1:0 hasabynda ýeňiş gazandy.
7. Saud Arabystanynda 2034-nji ýylda geçiriljek futbol boýunça dünýä çempionaty aşa yssy we musulmanlaryň mukaddes Remezan aýynyň gelmegi göz öňünde tutulyp, ýanwar aýynda geçirilip bilner diýip, «The Times» habar berýär. Mundan ozal habar beriş serişdeleri FIFA-nyň sebitde tomsuň örän yssy bolýandygy sebäpli ýaryşy gyşa süýşürip biljekdigini habar berdiler. Ilkinji gyşky futbol boýunça dünýä çempionaty 2022-nji ýylyň noýabr-dekabr aýlarynda Katarda geçirilipdi.
