Türkmenistanyň Prezidenti Serdar Berdimuhamedow wise-premýer T.Atahallyýewiň hem-de welaýatlaryň häkimleriniň gatnaşmagynda iş maslahatyny geçirdi. Bu barada "Watan" habarlar gepleşiginde habar berildi.
Bellenilişi ýaly, iş maslahatynda ýurduň oba hojalyk toplumynda we welaýatlarynda alnyp barylýan işlere hem-de Oba milli maksatnamasynyň ýerine ýetirilişi bilen baglanyşykly meselelere garaldy.
Ilki bilen, welaýatlaryň häkimleri sebitleriň ekerançylyk meýdanlarynda alnyp barylýan işleriň ýagdaýy barada hasabatlary berdiler.
Hasabatlarda bellenilişi ýaly, häzirki wagtda welaýatlarda pagta hasylyny soňky hanasyna çenli ýygnap almak boýunça degişli işler geçirilýär. Şunda oba hojalyk tehnikalaryndan netijeli peýdalanylýar, ýygnalan hasyl kabul ediş harmanhanalarynda, pagta arassalaýjy kärhanalarda bökdençsiz kabul edilýär. Döwlet harmanyna tabşyrylan pagta hasyly üçin önüm öndürijiler bilen hasaplaşyklar öz wagtynda geçirilýär. Bugdaý ekilen meýdanlarda agrotehnikanyň talaplaryna laýyklykda ideg etmek, hususan-da, ösüş suwuny tutmak, ekini organiki we mineral dökünler bilen iýmitlendirmek işleri alnyp barylýar.
Hasabatlarda geljek ýylyň hasyly üçin welaýatlarda gowaça ekiljek meýdanlary ekiş möwsümine taýýarlamak üçin ýerleri mineral dökünler bilen iýmitlendirmek we sürüm işleriniň geçirilýändigi barada hem aýdyldy.
Häkimler welaýatlarda Halkara Bitaraplyk güni mynasybetli geçiriljek baýramçylyk çärelerine taýýarlyk görlüşi, dekabr aýynda açylyp ulanmaga berilmegi meýilleşdirilýän medeni-durmuş we önümçilik maksatly binalardyr desgalardaky gurluşyk işleriniň barşy barada hem hasabat berdiler.
Prezident Serdar Berdimuhamedow hasabatlary diňläp, pagta hasylyny soňky hanasyna çenli ýygnap almagyň, bugdaý ekilen ýerlerde ideg işleriniň agrotehnikanyň talaplaryna laýyk geçirilmeginiň möhümdigini belledi we bu babatda häkimlere anyk tabşyryklary berdi.
Döwlet Baştutany Oba milli maksatnamasyna laýyklykda dekabr aýynda welaýatlarda açylyp ulanmaga berilmegi meýilleşdirilýän medeni-durmuş we önümçilik maksatly binalardaky we desgalardaky gurluşyk işleriniň talabalaýyk ýerine ýetirilmegini gözegçilikde saklamagy, olaryň açylyş dabaralaryna ýokary derejede taýýarlyk görmegi tabşyrdy.
Iş maslahatynyň barşynda wise-premýer T.Atahallyýew hem ýurtda dowam edýän möwsümleýin oba hojalyk işleriniň barşy barada hasabat berdi. Hasabatda ýazky ekiş möwsüminde oba hojalyk işlerinde ulanyljak tehnikalary we gurallary abatlamak, bejermek işleriniň geçirilýändigi; geljek ýyl daýhanlary bioönümler bilen ýeterlik möçberde üpjün etmek maksady bilen, welaýatlardaky biokärhanalaryň zerur ýerlerinde abatlaýyş we bejeriş işlerini geçirmek hem-de olary çig mal we enjamlar bilen üpjün etmek boýunça zerur çäreleriň görülýändigi; Mary welaýatynda gant şugundyrynyň hasylyny ýygnap almak we bu möwsümi öz wagtynda geçirmek boýunça degişli işleriň geçirilýändigi barada hem aýdyldy.
Döwlet Baştutany hasabaty diňläp, oba hojalygy pudagynyň milli ykdysadyýetdäki möhüm ornuna ünsi çekdi we wise-premýere bu ugurda ýaýbaňlandyrylan möwsümleýin işleriň ýokary hilli hem-de guramaçylykly alnyp barylmagyny gözegçilikde saklamagy tabşyrdy.
Prezident Serdar Berdimuhamedow iş maslahatyna gatnaşyjylara ýüzlenip, bugdaý ekilen ýerlerde ideg işleriniň geçirilişine berk gözegçilik etmegiň, bugdaý meýdanlarynda birinji ösüş suwuny tutmak, ekini mineral dökünler bilen iýmitlendirmek işlerini agrotehniki möhletlerde geçirmegiň, haşal otlara garşy işleriň öz wagtynda alnyp barylmagynyň, ekilen bugdaýdan kadaly gögeriş alynmagyna aýratyn üns bermegiň möhümdigini belledi.
Döwlet Baştutany welaýatlaryň gowaça meýdanlarynda galan pagtany iň soňky hanasyna çenli ýygnap almagyň möhümdigini belläp, geljek ýylyň hasyly üçin gowaça ekiljek ýerlerde sürüm işleriniň talabalaýyk geçirilmegini berk gözegçilikde saklamagy, şol ýerleri fosfor döküni bilen gurplandyrmak boýunça degişli işleri geçirmegi üpjün etmegi tabşyrdy.
Prezident Serdar Berdimuhamedow geljek ýylyň möwsümleýin oba hojalyk işlerinde daýhanlary zerur serişdeler bilen üpjün etmek meselesine ünsi çekip, welaýatlardaky biokärhanalarda bioönümleri öndürmek işlerini talabalaýyk ýola goýmagy, bu kärhanalaryň önümçilik binalaryny talabalaýyk saklamagy, olary çig mal bilen wagtynda üpjün etmegi tabşyrdy.
Şeýle-de döwlet Baştutany pagta öndürijiler bilen doly hasaplaşyklary geçirmegi, daýhan birleşiklerinde oba hojalyk işlerini geçirmekde sarp edilen nebit önümleri üçin tölegleriň geçirilişini gözegçilikde saklamagy, welaýatlarda pagta we bugdaý öndürijiler bilen hyzmat edýän edara-kärhanalaryň arasynda şu ýylyň pagta, geljek ýylyň bugdaý hasyly üçin ýerine ýetirilen işler boýunça hasaplaşyklaryň öz wagtynda geçirilmegini üpjün etmegi, Mary welaýatynda ýetişdirilen gant şugundyrynyň hasylyny zaýasyz ýygnap almagy, welaýatlarda Oba milli maksatnamasynyň ýerine ýetirilişine hemişe gözegçilik etmegi tabşyrdy.
Prezident Serdar Berdimuhamedow ähli ýerlerde Halkara Bitaraplyk gününe gowy taýýarlyk görmegi, baýramyň bellenýän günlerinde bazarlaryň we dükanlaryň dürli önümler bilen bolelin üpjün edilmegini berk gözegçilikde saklamagy, welaýatlarda dekabr aýynda medeni-durmuş we önümçilik maksatly binalardyr desgalary açyp ulanmaga bermäge gowy taýýarlyk görmegi tabşyrdy.
