Hytaý ýakyn üç ýylda Merkezi Aziýa döwletleriniň talyplaryna ýurduň ýokary okuw mekdeplerinde bilim almak üçin 600 sany talyp hakyny hödürlär we sebitiň ýurtlaryndan 1,5 müň hünärmeni gaýtadan taýýarlamagy maliýeleşdirer.
Bu barada Çendu şäherinde geçirilen «Merkezi Aziýa – Hytaý» formatyndaky daşary işler ministrleriniň bäşinji duşuşygynyň jemlerine esaslanyp, Hytaýyň DIM-iniň ýolbaşçysy Wan I mälim etdi.
Ýeri gelende ýatlatsak, Hytaýyň we Merkezi Aziýa döwletleriniň daşary işler ministrleriniň bäşinji duşuşygy Hytaýyň daşary syýasat edarasynyň ýolbaşçysy Wan Iniň ýolbaşçylyk etmeginde geçirildi. Oňa Gazagystanyň, Gyrgyzystanyň, Täjigistanyň, Türkmenistanyň we Özbegistanyň daşary işler ministrleri hem gatnaşdylar. Taraplar geljek ýyl Gazagystanda geçiriljek ikinji «Hytaý — Merkezi Aziýa» sammitine taýýarlyk meselesini ara alyp maslahatlaşdylar hem-de ykdysady gatnaşyklary ösdürmäge we medeni-ynsanperwer alyş-çalyşlary pugtalandyrmaga ygrarlydyklaryny tassykladylar.
Mundan ozal, Türkmenistanyň Bilim ministrliginiň 2025/2026-njy okuw ýyly üçin Wengriýanyň we Hytaýyň ýokary okuw mekdeplerinde bakalawr maksatnamasy boýunça okuwa girmek isleýänleriň arasyndan dalaşgärleri seçip almaklygy yglan edendigini habar beripdik.
