Şu gün Türkmenistanyň Bilim ministrliginde Italiýanyň Türkmenistandaky Adatdan daşary we Doly ygtyýarly ilçisiniň ýolbaşçylygyndaky italýan wekiliýeti bilen duşuşyk geçirildi. Oňa Türkmenistanyň Bilim ministrliginiň hem-de öňdebaryjy türkmen ýokary okuw mekdepleriniň wekilleri, şol sanda Magtymguly adyndaky TDU-nyň we Halkara ynsanperwer ylymlary we ösüş uniwersitetiniň prorektorlary gatnaşdylar.
Türkmenistanyň Bilim ministrliginiň metbugat gullugynyň habar bermegine görä, duşuşykda Türkmenistan bilen Italiýanyň arasynda bilim ulgamyndaky hyzmatdaşlygy pugtalandyrmaga gönükdirilen meseleleriň uly toplumy ara alnyp maslahatlaşyldy. Italýan wekiliýetiniň agzalary tejribe alyşmak we bilelikdäki başlangyçlary durmuşa geçirmek üçin özboluşly mümkinçilikleriň bardygyny belläp, Merkezi Aziýa bilen hyzmatdaşlygyň strategiki ähmiýetine ünsi çekdiler.
Gepleşiklerde ara alnyp maslahatlaşylan esasy ugurlar 2024-nji ýylyň 29-njy maýynda geçirilen Italiýa — Merkezi Aziýa formatyndaky üçünji ministrler maslahatynda gozgalan temalar bilen bagly boldy. Şunuň bilen baglylykda, aýry-aýrylykda hyzmatdaşlygyň beýleki ugurlaryny goldamagy we ösdürmegi üpjün edýän möhüm binýat hökmünde bilimiň we ylmy gözlegleriň ähmiýeti aýratyn nygtaldy.
Duşuşygyň netijeleri taraplaryň hyzmatdaşlygy has-da çuňlaşdyrmaga taýýardygyny tassyklady. Onuň dowamynda ara alnyp maslahatlaşylan başlangyçlar Türkmenistan bilen Italiýanyň arasynda durnukly gatnaşyklaryň ösmegine, innowasiýa, sebit hyzmatdaşlygy we medeni alyş-çalyş ugurlarynda bilelikdäki tagallalaryň has-da işjeňleşmegine täze mümkinçilikleri döreder.
