Türkmenistanyň Bilim ministrligi 2025/2026-njy okuw ýyly üçin Wengriýanyň we Hytaýyň ýokary okuw mekdeplerinde bakalawr maksatnamasy boýunça okuwa girmek isleýänleriň arasyndan dalaşgärleri seçip almaklygy yglan etdi.

Dalaşgärlerden resminamalary kabul edişlik 25-nji noýabrdan 10-njy dekabra çenli Halkara ynsanperwer ylymlary we ösüş uniwersitetinde geçirilýär. Bu barada ministrlige salgylanmak bilen, «Türkmenistan: Altyn asyr» saýty habar berýär.

Resminamalar şu şertlerde kabul edilýär:

- Wengriýada okamak isleýänler üçin: 2024-2025-nji okuw ýylynda orta mekdebi tamamlan okuwçylar, olar 31-nji awgusta çenli 18 ýaşa ýeten bolmaly;
- Hytaýda okamak isleýänler üçin: 2024-2025-nji okuw ýylynda orta mekdebi tamamlan okuwçylar, 18 ýaşa ýetenler we 25 ýaşdan geçmedik raýatlar.

Iňlis dilini bilmek hökmany talap bolup durýar.

Tabşyrmaly resminamalaryň sanawy Türkmenistanyň Bilim ministrliginiň saýtyndan alyp bilersiňiz.

Zerur bolan resminamalary tabşyran dalaşgärler iňlis dilinde doly orta mekdebiň bilim maksatnamasyna laýyk gelýän dersler boýunça söhbetdeşlikden geçerler.

Hytaýyň we Wengriýanyň ýokary okuw mekdeplerine ýokary hünär ugrunyň okuw maksatnamasy boýunça (bakalawriat) hünär ugurlarynyň sanawy we dalaşgärleriň sany baradaky maglumatlar, şeýle hem okamagyň şertleri hakyndaky maglumatlary resminamalary kabul etmek baradaky Topar tarapyndan berilýär.

Halkara ynsanperwer ylymlary we ösüş uniwersitetiniň salgysy: Aşgabat şäheri, 1958-nji (Andalyp) köçe, jaý 169.

Habarlaşmak üçin telefon belgileri: (+993 12) 39-85-62, 39-85-25 we elektron poçtasy: mailto:admissioniuhd@gmail.com.

Türkmenistanyň 2025-2026-njy okuw ýylynda Hytaýyň we Wengriýanyň ýokary okuw mekdeplerine talyplary ugradýandygy barada biz ozal habar beripdik.