Düýn «Arçabil» myhmanhanasynda Durnukly ulagyň dostlary toparynyň ikinji ministrler maslahaty geçirildi.

«Halkara ulag-üstaşyr geçelgeleri: özara arabaglanyşyk we ösüş – 2024» atly halkara maslahatynyň we serginiň çäginde guralan maslahata Türkmenistanyň degişli ministrlikleriniň we ulag edaralarynyň ýolbaşçylary we wekilleri, şeýle hem halkara we sebit guramalary, hususan-da, BMG-niň ýöriteleşdirilen düzüm birlikleri, Durnukly ulagyň dostlary toparyna agza ýurtlaryň diplomatik wekilhanalarynyň ýolbaşçylary we wekilleri, ulag pudagynyň bilermenleri, şeýle hem köpçülikleýin habar beriş serişdeleriniň wekilleri gatnaşdylar.

Duşuşygyň dowamynda taraplar dünýä derejesinde ulag ulgamlarynyň durnukly ösüşi babatynda täze täsirli çözgütleriň işlenip düzülmegini nazara almak bilen, Durnukly ulagyň dostlary toparynyň işini has hem kämilleşdirmegiň mümkinçiliklerine garadylar.

Durnukly ulagyň dostlary toparyna goşulmak islegini mälim eden täze agza ýurtlary kabul etmek meselesine hem garaldy.

Duşuşygyň dowamynda BMG-niň 2026–2035-nji ýyllaryň «Durnukly ulagyň onýyllygyna» taýýarlyk görmek üçin tagallalary birleşdirmegiň zerurdygy bellenildi.

Mundan başga-da, gatnaşyjylar Toparyň işini has-da kämilleşdirmegiň hem-de ulag we logistika pudagynda ýüze çykýan kynçylyklary ýeňip geçmek üçin tagallalary birleşdirmegiň, şol sanda sebit we ählumumy päsgelçilikleri azaltmagyň ýollaryny, şeýle hem BMG-na agza ýurtlaryň ulag ösüşi babatdaky başlangyçlaryny öňe sürmegiň zerurdygyny nygtadylar.

Durnukly ulagyň dostlary toparynyň ikinji ministrler maslahatynyň netijeleri boýunça Jemleýji jarnama kabul edildi.