27-nji noýabrda Aşgabatda «Visa» töleg tehnologiýalarynyň forumy: Merkezi Aziýada we Türkmenistanda innowasiýalaryň we sanly özgerişleriň 30 ýyly» atly halkara işewürlik forumy öz işine başlady. Çärä dünýäniň dürli ýurtlaryndan paýtagtymyza gelen 100-e golaý wekil gatnaşýar.
Umumy mejlisde maliýe pudagynyň esasy wekilleri, şol sanda Türkmenistanyň Döwlet daşary ykdysady iş bankynyň başlygy we «Visa» kompaniýasynyň wise-prezidenti çykyş etdiler. Olaryň çykyşlarynda sebitiň bank ulgamynda sanlylaşdyrmagyň we innowasion tehnologiýalary ornaşdyrmagyň ähmiýeti bellenildi. «Visa» kompaniýasynyň Merkezi Aziýa boýunça baş direktory Anton Borozdin Merkezi Aziýa we Türkmenistan täze tehnologiýalar we sanly çözgütler boýunça özüne çekiji özboluşly merkeze öwrülýär, bu bolsa töleg tehnologiýalarynyň ösmegine we ykdysady ösüşiň has-da batly depgine eýe bolmagyna itergi berýär.
Borozdin tehnologik ösüşiň iki esasy faktoryna - emeli aňa we ýaş nesle aýratyn üns berdi. Visa esasy ünsi maliýe hyzmatlarynyň şahsy derejä getirilmegine we tranzaksiýalaryň goralmagyna jemlemek bilen, emeli aňy döretmeklige gönükdirilen tehnologiýalary ösdürmäge 10 milliard dollardan gowrak maýa goýdy. Statistika sebitiň mümkinçiligini uludygyny tassyklaýar: telekeçileriň 79% halkara bazarlaryna çykmaga ymtylýar, sarp edijiler 72% bolsa serhet ýakasyndaky söwdalary amala aşyrmaga taýýardyr. Türkmenistanda dört ýylyň içinde bank kartlarynyň ulanyjylarynyň sany 41%, terminallaryň sany 12% ösdi, internet-banking ulgamynyň ulanyjylarynyň sany bolsa 1 million adamdan geçdi.
Sebitiň ýaş nesli özgerişleriň esasy ösüşe itergi beriji güýç bolup durýar. 35 ýaşa çenli bolan adamlar ykjam bank goşundylaryny üç esse köp ulanmak bilen, adaty bank bölümlerine barmagyň deregine onlaýn hyzmatlardan peýdalanmagy has makul bilýärler. Olaryň ortaça ýyllyk karz dolanyşygy 18 000 dollara barabar. «Visa» maliýe guramasynyň wekilleriniň belleýşi ýaly, Merkezi Aziýa indi tehnologik taýdan çetki sebit bolmagyny bes edip, maliýe innowasiýalarynyň özbaşdak merkezine öwrülýär. Sebit diňe global ugurlara uýgunlaşmak bilen çäklenmän, eýsem dünýä boýunça uly möçbere eýe bolup biljek özüniň gaýtalanmajak özboluşly çözgütlerini döredýär.
