Girmek
Türkmenistanly küştçi Saparmyrat Atabaýew Daşkent şäherinde geçirilýän halkara küşt ýaryşynda üstünlikli ýörüşini dowam etdirýär. Has takygy, «Prezident kubogy» diýlip atlandyrylýan bu ýaryşda türkmen küştçüsi 5 tapgyrdan soňra 4 utuk toplap, ikinji orny ýedi küştçi bilen bölüşip dur. Birinji ýerdäki ýer eýesi Jawohir Sindarowda bolsa 4,5 utuk bar.
Saparmyrat Atabaýew ýaryşdaky deslapky 2 oýnuny deňlikde tamamlan bolsa, soňra bassyr 3 ýeňiş gazandy. Şu gün ol özi ýaly 4 utuk toplan hindistanly Nihal Sarin bilen güýç synanyşar. Bu gapma-garşylykda türkmen türgeniniň ak mallar bilen oýnaýandygyny göz öňünde tutsak, onuň ýene ýeňiş gazanmak ähtimallygy ýokary.
Ýeri gelende bellesek, ýaryşyň umumy baýrak gaznasy 75 müň amerikan dollaryna barabardyr. Oňa Türkmenistan bilen bir hatarda, Hindistandan, Hytaýdan, Gazagystandan, Gyrgyz Respublikasyndan, Eýrandan, Azerbaýjandan we Ukrainadan türgenler gatnaşýarlar.