Türkmenistanyň Prezidenti Aşgabadyň Täze ýyl bezegleri bilen bagly teklibi goldady, Türkmenistan 2025-2026-njy okuw ýylynda talyplary Hytaýyň we Wengriýanyň ýokary okuw mekdeplerine okamaga iberer, Tbiliside Türkmen kinosynyň günleri açyldy we beýleki habarlar
Türkmenistanda
1. Hökümetiň nobatdaky mejlisinde wise-premýer B.Annamämmedow Täze ýyl baýramyna taýýarlyk görmegiň çäklerinde Aşgabat şäherinde alnyp barylýan işler barada hasabat berdi. Aşgabadyň esasy medeni ojaklarynda, şaýollarynda, dynç alyş seýilgählerinde, medeni-köpçülikleýin çäreleriň geçirilýän ýerlerinde Täze ýyl arçalaryny bezemek, beýleki bezeg işlerini geçirmek göz öňünde tutulýar. Döwlet Baştutany hödürlenen teklibi goldady hem-de bu ugurda degişli işleri geçirmegi tabşyrdy.
2. Türkmenistanyň Prezidenti Serdar Berdimuhamedow türkmen talyplaryny Hytaýyň we Wengriýanyň ýokary okuw mekdeplerine okamaga ibermek baradaky teklibi goldady. Ýaşlar maglumat tehnologiýalary, lukmançylyk, pedagogika we inženerçilik işi ýaly birnäçe ileri tutulýan ugurlar boýunça bilim alarlar. Bu karar Hökümetiň mejlisinde wise-premýer B.Orazdurdyýewanyň hasabatyndan soň kabul edildi. Döwlet Baştutany türkmen ýaşlarynyň müňlerçesiniň daşary ýurtlaryň abraýly bilim edaralarynda okaýandyklaryny belläp, ýurtda ýokary derejeli hünärmenleri taýýarlamagyň möhümdigini aýtdy.
3. Tbilisi şäherinde Türkmenistanyň ilçihanasy bilen Gruziýanyň Kinoakademiýasynyň bilelikde guramagynda Türkmen kinosynyň güni açyldy. Bu çäre şahyr Magtymguly Pyragynyň doglan gününiň 300 ýyllygyna bagyşlandy. Açylyş režissýor Maksat Gylyjowyň «Kompozitor» atly filmiň görkezilişi bilen başlandy. Şeýle-de çäräniň maksatnamasyna Arslan Eýeberdiýewiň «Istärin» we Sahysalyh Baýramowyň «Gyzyl kürte» atly kinolary girizildi.
4. Dekabr aýynda Aşgabatda Türkiýe Respublikasynyň eksport harytlarynyň sergisini, şeýle hem Türkmen-türk işewürler geňeşiniň nobatdaky maslahaty geçiriler. Bu giň gerimli foruma türk kompaniýalarynyň hem-de birleşmeleriniň 70-den gowragynyň gatnaşmagy göz öňünde tutulýar. Sergä gatnaşyjylar, esasan, enjamlary we tehniki serişdeleri, binalaryň ýyladyş-sowadyş ulgamlaryny, himiki we gurluşyk serişdelerini, dokma, azyk senagatynyň önümlerini, derman serişdelerini, öý hojalyk harytlaryny öndürijilerden, logistika, hyzmatlar ulgamynda iş alyp barýan kompaniýalardan ybarat bolar.
5. Türkmenistanyň halkara maliýe reýtingini we abraýyny ýokarlandyrmak, degişli düzümler, hususan-da, «Fitch Ratings» agentligi bilen hyzmatdaşlygy pugtalandyrmak boýunça degişli çäreler görülýär. Bellenilişi ýaly, agzalan agentlik tarapyndan geçirilen seljerme işleriniň netijesinde, şu ýylyň awgustynda Türkmenistanyň karz reýtingi ýokarlandyryldy. Prezident Serdar Berdimuhamedow Türkmenistanyň halkara maliýe derejesini berkitmek babatda netijeli işleriň durmuşa geçirilýändigini, halkara reýting agentlikleri bilen hyzmatdaşlygyň alnyp barylýandygyny belledi.
Dünýäde
6. Ýaponiýanyň raýatlarynyň sanly mirasyny tertipleşdirmek maksady bilen, Sarp edijileriň hukuklaryny goramak boýunça milli merkez wesýetnamalarda onlaýn hasaplar üçin loginleri we parollary görkezmegi maslahat berýär. Wesýetnamada loginleri we parollary goşmak eýesi ölenden soň onuň ýakynlaryna tölegli hyzmatlary öçürmek we köne hasaplary ýapmak hukugyny berer. Merkeziň bilermenleriniň pikiriçe, bu çemeleşmäniň ekologiýa tarapy hem bar – ulanylmadyk hasaplary pozmak maglumat merkezleriniň ýüküni azaldar, bu bolsa uglerodyň yzyny azaltmaga kömek edýär.
7. «Apple Music» aýdym-saz akym hyzmaty amerikaly aýdymçy Billi Aýlişi ýylyň aýdymçysy hökmünde ykrar etdi. 2024-nji ýyl ýerine ýetiriji üçin aýratyn üstünlikli ýyl boldy. Onuň üçünji studiýa albomy «Hit Me Hard and Soft» 138 ýurtda ýaýlym sanawynda birinji orny eýeledi. Mundan başga-da, «Barbi» kinofilmi üçin döredilen «What I Was Made For» kompozisiýasy Aýlişe ikinji «Oskar» heýkeljigini we iki sany abraýly «Gremmi» baýragyny getirdi.
Sport täzelikleri
8. Türkmenbaşynyň «Şagadamy» futbol boýunça Türkmenistanyň çempionatynyň 30-njy tapgyrynda öz meýdançasynda Balkanabadyň «Nebiçti» toparyny ýeňdi. Duşuşyk ýer eýeleriniň peýdasyna 4:3 hasabynda tamamlandy. Ýeňijileriň düzüminden Musa Nurnazarow iki gol geçirdi. Hydyrgeldi Atjanow we Begmyrat Arbatow hersi bir gol geçirdi.
9. Günüň başga bir oýnunda «Merwiň» futbolçylary Aşgabadyň «Köpetdagyndan» üstün çykdylar. Ýeňijileriň düzüminde Şöhrat Owmadow we Serdar Annamämmedow gol geçirdiler.
