Taraplaryň häzirki hyzmatdaşlyk meseleleri Türkmenistanyň Astrahandaky konsuly Gadam Ilamanow bilen Russiýa Federasiýasynyň Astrahan sebitiniň daşary gatnaşyklar ministri Wladimir Golowkowyň arasyndaky duşuşygyň esasy mowzugy boldy.
Duşuşykda söwda, ykdysady we ynsanperwerlik ugurlarda ikitaraplaýyn gatnaşyklaryň işjeň alnyp barylýandygy bellenildi. Bu barada «nCa» ýazýar.
«Türkmenistanyň ýolbaşçylarynyň Astrahan sebiti bilen hyzmatdaşlygyň ösdürilmegine aýratyn üns berýändigi begendirýär. Golaýda Astrahan sebitiniň Hökümetiniň başlygy Denis Afanasýewiň ýolbaşçylygyndaky wekiliýetiň
Aşgabat şäherine eden sapary muny ýene bir gezek görkezdi. Türkmenistanyň ministrliklerinde we pudaklarynda netijeli duşuşyklardyr gepleşikler geçirildi. Öňde bilelikdäki alyp barmaly köp işimiz bar» diýip, Wladimir Golowkow aýtdy.
Taraplar Astrahan portunyň ýörite ykdysady zolagynda Türkmenistanyň logistika merkezini döretmek, Aşgabat — Astrahan — Kazan ugurlarynda göni uçuşlaryň açylmagy bilen baglanyşykly meseleleri, 2025-nji ýylda «Astrahan sebiti — Türkmenistan: Söwda we ykdysady hyzmatdaşlygyň täze gözýetimleri» atly işewürlik forumyny we onuň çäginde Türkmenistanyň wekiliýetiniň Astrahana saparyny guramak bilen, bilelikdäki Astrahan-Türkmenistan telekeçilik geňeşiniň 4-nji duşuşygyny geçirmek meselelerini ara alyp maslahatlaşdylar.
Taraplar ynsanperwerlik pudagynda hyzmatdaşlygyň dürli ugurlaryna-da degip geçdiler. Astrahan sebitiniň we Türkmenistanyň bilim edaralarynyň özara gatnaşygy, türkmen şahyry we akyldary Magtymguly Pyragynyň doglan gününiň 300 ýyllygy mynasybetli sebitde geçirilen dabaraly çärelere gatnaşyjylary sylaglamak bilen baglanyşykly çäreler barada hem pikir alyşyldy.
Duşuşygyň ahyrynda sebitiň daşary gatnaşyklar ministri we Türkmenistanyň konsuly uzak möhletleýin özara hyzmatdaşlyk meýilnamasyny düzmek barada ylalaşdylar, bu meýilnama esasan hem Türkmenistanyň wekiliýetleriniň Astrahan sebitinde 2025-nji ýylda geçiriljek halkara çärelerine gatnaşmagyny öz içine alar.
