7-nji oktýabr Türkmenistanda dynç güni bolar, Türkmenistanyň üç welaýatynda onkologiýa hassahanalary gurlar, 10-njy oktýabrda Arkadagda VI Wena baly geçiriler we beýleki habarlar
Türkmenistanda
1. Türkmenistanyň Prezidenti Serdar Berdimuhamedow dynç gününi 6-njy oktýabrdan 7-nji oktýabra geçirmek hakynda Permana gol çekdi. Permana laýyklykda, dynç güni 6-njy oktýabrda bellenilýän Hatyra gününiň dynç gününe düşýändigi sebäpli geçirilýär. Resminama Türkmenistanyň Zähmet kodeksiniň 81-nji maddasynyň ikinji bölegine laýyklykda kabul edildi.
2. Türkmenistanda VI Wena baly 10-njy oktýabrda Arkadag şäherinde geçiriler. Döredijilik forumyna Saglygy goraýyş we derman senagaty işgärleriniň gününe bagyşlanan dabaralaryň, «Döwürleriň we siwilizasiýalaryň özara arabaglanyşygy — parahatçylygyň we ösüşiň binýady» atly halkara forumyň we beýleki çäreleriň myhmanlary gatnaşar.
3. Türkmenistanyň Balkan, Lebap we Mary welaýatlarynda onkologiýa hassahanalary gurlar. Türkmenistanyň Prezidenti degişli Karara gol çekdi. Resminama laýyklykda, Türkmenistanyň Döwlet daşary ykdysady iş bankyna Türkmenistanyň Hökümetiniň adyndan Balkan we Lebap welaýatlarynyň hersinde bir sany 150 orunlyk onkologiýa hassahanasynyň gurluşygynyň taslamasyny maliýeleşdirmek üçin Yslam Ösüş banky bilen degişli ylalaşyklary baglaşmaga, Mary welaýatynda 200 orunlyk onkologiýa hassahanasynyň gurluşygynyň taslamasyny maliýeleşdirmek üçin Saud Ösüş gaznasy bilen degişli ylalaşygy baglaşmaga ygtyýar berildi.
4. Türkmenistanyň Prezidenti Serdar Berdimuhamedow Täjigistan Respublikasynyň Prezidenti Emomali Rahmona doglan güni mynasybetli gutlag hatyny iberdi. «Täjigistan Respublikasynyň syýasy-jemgyýetçilik durmuşynyň ähli ugurlarynda gazanylan uly üstünlikler, ýurduň ykdysady ösüşinde ýetilen belent sepgitler, şeýle hem dünýäde at-abraýynyň yzygiderli berkemegi Siziň adyňyz bilen aýrylmaz baglanyşyklydyr» diýip, türkmen döwletiniň Baştutany gutlag hatynda nygtady we Emomali Rahmona berk jan saglyk, bagtyýarlyk, jogapkärli döwlet işinde uly üstünlikleri arzuw etdi.
5. 7 – 9 oktýabrda Türkmenistanda Gazagystanyň Medeniýet günleri geçiriler, onuň çäklerinde çäreleriň baý maksatnamasy meýilleşdirilýär. Aşgabadyň ýaşaýjylary we myhmanlary gazak kinosy, goňşy ýurduň saz sungaty we halk däp-dessurlary bilen bu ýerde tanşyp bilerler. Medeniýet günleriniň açylyşy 7-nji oktýabrda «Aşgabat» kinoteatrynda «Beýik sähranyň daňy» atly gazak filminiň görkezilmegi bilen başlanar. Şol gün Türkmenistanyň Döwlet medeniýet merkeziniň Mukamlar köşgünde Kurmangazy adyndaky gazak halk saz gurallarynyň milli orkestri çykyş eder. Medeniýet günleri 9-njy oktýabrda Mukamlar köşgünde iki ýurduň sungat ussatlarynyň giň gerimli bilelikdäki konserti bilen tamamlanar.
6. Russiýanyň Hökümeti 2025/26 okuw ýylynda Türkmenistandan dalaşgärlere bilim almak üçin 500 orun bölüp berdi. Russiýanyň ýokary okuw mekdeplerinde býujetli orunlara dalaşgärleri seçip almak işleri 7-nji oktýabrda başlanýar. Bäsleşik esasynda seçip almaklyga gatnaşmak isleýänler education-in-russia.com resmi portalynda hasaba alynmalydyrlar. Bu maksatnama türkmen dalaşgärlerine Russiýanyň öňdebaryjy uniwersitetlerinde tölegsiz esasda ýokary bilim almak mümkinçiligini döredýär.
Dünýäde
7. Ýakynda geçirilen gözleg soňky 40 ýylda Antarktika ýarym adasyndaky ösümlik örtüginiň ep-esli artandygyny ýüze çykardy. Ekseter uniwersitetiniň we Britan Antarktida gullugynyň alymlary emeli hemra maglumatlaryndan peýdalanyp, ýaşyl zolagyň 10 esse ulalandygyny anykladylar. 1986-njy ýylda ösümlik örtügi 1 inedördül kilometrden azdy, 2021-nji ýyla çenli onuň meýdany 12 inedördül kilometre ýetdi. Alymlar ösümlikleriň ösmeginiň ozal ýok ýerlerinde topragyň döremegine sebäp bolup biljekdigini bellediler. Bu bolsa öz gezeginde täze ösümlik görnüşleriniň döremegine şert döredip biler.
Sport täzelikleri
8. Aşgabatda Türkmenistanyň Federasiýasynyň Kubogy ugrunda küşt ýaryşy geçirilýär. Oňa tutuş ýurtdan 285 küştçi gatnaşýar. Bäsleşik iki ugurda geçirilýär: 1700 baldan ýokary FIDE reýtingi bolan oýunçylar we heniz bu derejä ýetmedikler üçin. Bu ýaryş aýratyn ähmiýete eýedir, çünki ýeňijiler 2025-nji ýylda Türkmenistanyň çempionatynyň Ýokary ligasyna gatnaşmak hukugyny alarlar. Bäsleşik nusgawy wagt gözegçiligi bilen 11 tapgyry, şeýle hem çalt we has çalt küşt boýunça goşmaça ýaryşlary öz içine alýar. Federasiýanyň Kubogy ugrundaky ýaryş ikinji gezek geçirilýär we ýurduň dürli sebitlerinden gatnaşyjylary özüne çekýär. Gatnaşanlaryň ýaş aralygy 6 ýaşdan 61 ýaş aralygynda üýtgeýär.
9. 17-nji oktýabrda Malaýziýanyň paýtagtynda zenanlaryň arasynda futzal boýunça Aziýa Kubogy üçin saýlama ýaryşynyň bije çekişligi geçiriler. Saýlama ýaryşyň 2025-nji ýylyň ýanwar aýynda geçirilmegi göz öňünde tutulýar.
