Türkmenistan we TÜRKSOÝ medeni hyzmatdaşlygyň geljegini ara alyp maslahatlaşdylar, Türkmenistan medeni gymmatlyklaryň bikanun söwdasyna garşy göreş boýunça okuw maslahatyna gatnaşýar, futbol boýunça Türkmenistanyň ýaşlar ýygyndysy Ispaniýada türgenleşik ýygnanyşygyny geçirer we beýleki habarlar

Türkmenistanda

1. Aşgabatda Türkmenistanyň daşary işler ministri Raşid Meredow bilen TÜRKSOÝ-yň Baş sekretary Sultan Raýewiň ýolbaşçylygyndaky wekiliýetiň agzalarynyň arasynda duşuşyk geçirildi. 2024-nji ýyl türki dilli dünýäde Türkmenistan üçin ähmiýetli ýyl bolup durýar. Duşuşygyň gün tertibine hyzmatdaşlygyň möhüm meseleleri girizildi we gatnaşyklaryň geljegi uly bolan ugurlary kesgitlenildi. Duşuşykda Magtymguly Pyragynyň döredijiliginiň hem-de gadymy Änew şäheriniň medeni ähmiýetini wagyz etmeklige gönükdirilen bilelikdäki çäreleriň guramaçylygy bilen bagly meselelere aýratyn üns çekildi.

2. Türkmen wekiliýeti Antalýada geçirilýän medeni gymmatlyklaryň bikanun söwdasyna garşy göreş boýunça okuw seminaryna gatnaşýar. Türkmen wekiliýetiniň düzüminde ÝUNESKO-nyň işleri boýunça Türkmenistanyň Milli toparynyň jogapkär sekretary, şeýle hem Döwlet serhet gullugynyň, Döwlet gümrük gullugynyň we Döwlet muzeýiniň wekilleri bar. 2022-nji ýylyň sentýabr aýyndan bäri Türkmenistan ÝUNESKO-nyň «Medeni eýeçiligiň bikanun import edilmegini, eksportyny we geçirilmegini gadagan etmegiň we öňüni almagyň serişdeleri baradaky» halkara Konwensiýasynyň agzasy bolup, özüni bu ugurda işjeň hyzmatdaş hökmünde görkezdi.

3. Ene-atalar komitetiniň başlangyjy bilen Puşkin adyndaky Bilelikdäki türkmen-rus orta mekdebiniň 9-njy synp topary üçin ilkinji lukmançylyk kömegini bermegiň düzgünleri boýunça iki günlük okuw guraldy. Okuw Türkmenistanyň Gyzyl Ýarymaý milli jemgyýetiniň mugallymlary tarapyndan geçirildi. Dokuzynjy synp okuwçylar amaly sapaklaryň dowamynda şikesiň ol ýa-da beýleki derejesini kesgitlediler, infarkt, insult, ýanyk, zäherlenme ýagdaýynda we hatda ýylan çakanda we haýwan dişlände kömek bermegi öwrendiler.

4. Türkmenistanyň Tokiodaky ilçisi A.Baýramow we Filippinleriň Ýaponiýadaky ilçisi Milen Garsiýa-Albanonyň arasynda geçirilen duşuşykda ikitaraplaýyn hyzmatdaşlygy mundan beýläk-de ösdürmek bilen bagly meseleler ara alnyp maslahatlaşyldy. Taraplar şu ýylyň awgust aýynda Manilada gazanylan ylalaşyklaryň ýerine ýetirilişiniň gidişini ara alyp maslahatlaşdylar. Ýokary derejedäki özara saparlary guramak, parlamentara hyzmatdaşlygy ýola goýmak, söwda-ykdysady, medeni we ynsanperwer gatnaşyklary ösdürmek, şeýle hem halkara guramalarynyň çäklerinde hyzmatdaşlyk etmek meseleleri esasy üns merkezinde boldy.

5. «Awaza» milli syýahatçylyk zolagyndaky meşhur restoran mahmal möwsümde myhmanlaryny garşylamaga taýýar. Bu ýerde «Soltan» restorany müşderilerine datly aşhanalary we rahat dynç almak üçin köpdürli ýerleri hödürleýär. Bu ýere gelýänler Hazar deňziniň kenaryndaky stollary saýlap, restoranyň içindäki amatly atmosferadan lezzet alyp, ýa bolmasa-da VIP zolakda oturyp bilerler. Bu saýlaw her bir myhmana dynç almak we naharlanmak üçin özüne oňaýly ýer tapmaga mümkinçilik berýär. Mundan başga-da, «Soltan» restorany banketleri guramak üçin sargytlary kabul edýär. Munuň özi Awazanyň ajaýyp peýzažynyň fonunda möhüm wakalary baýram etmek üçin örän göwnejaýdyr.

Dünýäde

6. ESKATO-nyň howandarlygynda Astanda geçirilen sanly inklýuziýa we transformasiýa boýunça Aziýa-Ýuwaş umman maslahatynda Özbegistanyň Sanly tehnologiýalar ministrliginiň wekilleri gazak kärdeşleri bilen möhüm duşuşyk geçirdiler. Iki ýurduň kosmos pudagynda tagallalaryny birleşdirmek maksadynyň beýan edilmegi gepleşikleriň esasy netijesi boldy. Taraplar 2024-nji ýylyň ahyryna çenli kosmos emeli hemralaryny bilelikde uçurmak üçin anyk teklipleri taýýarlamak barada ylalaşdylar.

7. Hytaýyň Urumçi şäherinden ilkinji göni howa gatnawy boýunça uçar Ýerewanyň howa menziline gondy, munuň özi Ermenistan bilen Hytaýyň arasynda yzygiderli howa gatnawynyň ýola goýlandygyny alamatlandyrýar. Bu taryhy waka köp ýyllap dowam eden işleriň netijesi boldy we iki ýurduň arasyndaky gatnaşyklarda täze sahypany açdy. Urumçi – Ýerewan – Urumçi ugry boýunça uçuşlar hepdede iki gezek – sişenbe we şenbe günlerinde amala aşyrylar. Täze howa gatnawynyň ýolagçy akymynyň artmagyna, bilim we medeni gatnaşyklaryň ösmegine, şeýle hem iki halkyň arasyndaky işewür hyzmatdaşlygyň pugtalandyrylmagyna ýardam bermegine garaşylýar.

Sport habarlary

8. Futbol boýunça Türkmenistanyň 20 ýaşa çenli ýaşlar ýygyndysy 4 – 25-nji sentýabr aralygynda Ispaniýanyň Mursiýa şäherinde 2025-nji ýyldaky Aziýa kubogynyň saýlama oýunlaryna taýýarlyk görmek üçin okuw-türgenleşik ýygnanyşygyny geçirer. Baş tälimçi Döwletmyrat Annaýewiň ýolbaşçylygyndaky topar iki ýoldaşlyk duşuşygyny geçirmegi meýilleşdirýär: 7-nji sentýabrda Uelsiň milli ýygyndysyna we 9-njy sentýabrda Farer adalarynyň milli ýygyndysyna garşy. Topar Ispaniýa gitmezden ozal «Aşgabat» stadionynyň ýanaşyk meýdançalarynda ilkinji türgenleşikleri geçirdi.

9. Gonkongyň futbol boýunça Premýer-ligasynyň birinji tapgyrynda «Kitçi» topary myhmançylykda «Nort Distrikt» bilen 2:2 hasabynda deňme-deň oýnady. «Kitçiniň» düzüminde goly özbek hüjümçisi Şerzod Temirow we braziliýaly Žuninýo geçirdi. «Kiçiniň» türkmenistanly ýarym goragçysy Ruslan Mingazow duşuşygyň başlangyç düzümde oýna çykyp, tutuş oýunda çykyş etdi, emma täsirli netijeler bilen tapawutlanyp bilmedi. 14-nji sentýabrda geçiriljek indiki tapgyrda «Kitçi» öz meýdançasynda «Sautern Distrikti» kabul eder.

10. Futzal boýunça Türkmenistanyň milli ýygyndysy okuw-türgenleşik ýygnanyşygyna gatnaşmak üçin Birleşen Arap Emirliklerine geldi. Taýýarlygyň çäklerinde Ýakup Öwezowyň topary iki halkara ýoldaşlyk duşuşygyny geçirer: 5-nji sentýabrda Saud Arabystanyna we 7-nji sentýabrda Fransiýa garşy. Türkmen topary eýýäm Dubaýdaky ýygnanyşykda türgenleşiklere girişdi.