Gurbanguly Berdimuhamedow «Arçman» şypahanasynyň durkuny täzelemek taslamalary bilen tanyşdy, Türkmenistanyň Prezidenti «Çalsana, bagşy!» bäsleşiginiň ýeňijilerini sylaglady, Türkmenistanda 156 müň töweregi birinji synp okuwçysyna milli noutbuklar gowşurylar we beýleki habarlar

Türkmenistanda

1. Türkmen halkynyň Milli Lideri zähmet rugsady wagtynda Bäherden etrabyndaky «Arçman» şypahanasyna baryp gördi we şypahananyň çäginde gurulmagy meýilleşdirilýän we durky täzelenýän binalaryň taslamalary bilen tanyşdy. Hödürlenen taslamalaryň hatarynda şypahananyň 400 orunlyk täze binasy, suw arassalaýjy desga, 300 orunlyk mejlisler otagy, naharhanalar we çaýhana bar. Dynç alýanlaryň sanyny artdyrmaga mümkinçilik döretjek täze bejeriş bölüminiň gurluşygyna aýratyn üns berilýär. Gurbanguly Berdimuhamedow gurluşygyň hili, lukmançylyk enjamlary bilen üpjün etmek we ýanaşyk ýerleri abadanlaşdyrmak bilen baglanyşykly birnäçe anyk görkezmeleri berdi.

2. Türkmenistanyň Prezidenti degişli Karara gol çekdi. Resminama laýyklykda, «Çalsana, bagşy!» atly döredijilik bäsleşiginiň 14 sany ýeňijisi altyn zynjyr bilen sylaglanyldy. Ýaryş «Türkmeniň Altyn asyry» atly baýragyny almak ugrundaky bäsleşigiň çäklerinde dutarçy bagşylaryň arasynda geçirildi we ýurduň Garaşsyzlygynyň 33 ýyllyk baýramyna gabatlanyp guraldy. Ýeňijileriň arasynda sazçylyk mekdepleriniň mugallymlary, talyplar, harby gullukçylar we sungat işgärleri bar. Ýeňijiler ýurduň dürli sebitlerine, Aşgabat we Arkadag şäherlerine wekilçilik edýärler.

3. Şu ýyl Türkmenistanda 1-nji synpa okuwa barjak 155 müň 641 çaga «Bilimli» haryt nyşanly milli noutbuk kompýuterleri Prezident Serdar Berdimuhamedowyň adyndan sowgat berler. Olaryň ýarysyny «Aýdyň gijeler» hojalyk jemgyýeti taýýarlady, noutbuklaryň galan ýarysy bolsa «Agzybirlik tilsimaty» kärhanasy tarapyndan öndürildi. Mundan başga-da, Magtymguly adyndaky umumybilim berýän orta mekdebiň 1-nji synp okuwçylary üçin «Bilimli» haryt nyşanly noutbuklaryň 100-si öndürildi we Täjigistana üstünlikli iberildi.

4. Türkmenistanyň Prezidenti Serdar Berdimuhamedow Estoniýa Respublikasynyň Prezidenti Alar Karise iki ýurduň arasynda diplomatik gatnaşyklaryň ýola goýulmagynyň 30 ýyllygy mynasybetli gutlag hatyny iberdi. Türkmenistanyň döwlet Baştutany gutlag hatynda iki döwletiň arasyndaky gatnaşyklaryň birek-birege hormat goýmaga, deňhukuklylyga, özara ynanyşmaga esaslanýandygyny nygtady.

5. Türkmen wekiliýeti Kazanda geçirilen III Ählumumy ýaşlar sammitine gatnaşdy. Sammitiň çäklerinde ýaşlar bilen baglanyşykly möhüm meseleler ara alnyp maslahatlaşyldy. 43 ýurtdan 110-dan gowrak adam ýaşlaryň arasynda sanlylaşdyrma we sanly tendensiýalara giňişleýin baha berdiler. Türkmen tarapy döwletiň ýaşlar syýasatyny durmuşa geçirmekdäki tejribelerini paýlaşdy. Forumyň dowamynda türkmen wekiliýeti Başir Rameýew adyndaky tehnoparkyň işleri bilen tanyşdy. Şeýle hem türkmen wekilleri Wolga sebitiniň bedenterbiýe, sport we syýahatçylyk uniwersitetine, «Ýaratam» ýetginjekleri klubyna baryp gördüler. Mundan başga-da, wekiliýetiň agzalary Kazanyň merkezindäki dünýä derejesinde ýeke-täk bolan «Uram» ekstrim-seýilgähine bardylar.

В МИРЕ

6. «Meýtuan» kompaniýasy Beýik Hytaý diwarynda dronlar arkaly eltip bermek hyzmatyny ýola goýdy. Indi diwaryň Badalin atly günorta bölegine gelýän jahankeşdeler gezelenjiň dowamynda iýmit, içgi we hatda derman sargyt edip bilerler. Uçarmansyz uçýan enjamlar golaýdaky myhmanhananyň üçeginden gözegçilik diňine barýan ýoly bary-ýogy 5 minutda geçýärler, bu aralyk pyýada geçilende 50 minut töweregi wagt alýar. Bu hyzmat esasanam diwaryň tomusda güýçli yssy bolýan we saýa ýerleri bolmadyk täze açylan bölümi üçin has möhümdir.

7. Rimiň meşhur Prati etrabynda adatdan daşary waka boldy. 38 ýaşly ogry talamak üçin 71 ýaşly adamyň öýüne girip, kitap okamak bilen başagaý bolup, jenaýatçylykly niýetini ýatdan çykarypdyr. Ogry ýatylýan otagdaky tekjede duran bir kitaby gördi. Ol bar ünsüni kitap okamaga jemläp, wagty we başga biriniň öýündedigini ýatdan çykardy. Ogry eserden lezzet alýarka, öýüň eýesi oýanyp, çagyrylmadyk myhmany gördi. Ol adam derrew goňşularyndan kömek sorady we polisiýa jaň etdi. Wakanyň bolan ýerine gelen hukuk goraýjy işgärler ogryny balkonda gaçmaga synanyşýarka tutdular. Jenaýatçy tutulanda onuň ýanynda ozal ogurlanandygy çak edilýän dizaýnerlik goşlary bolan ýantorba bardy. Italiýanyň metbugaty talaňçyny «intellektual» diýip atlandyrdy.

Sport habarlary

8. Futbol boýunça Türkmenistanyň Ýokary ligasynyň 20-nji tapgyrynda «Arkadag» Aşgabadyň «Altyn asyryndan» üstün çykdy. Şenbe güni «Nusaý» stadionynda geçirilen duşuşyk 5:1 hasabynda tamamlandy. Duşuşygyň 27-nji minudynda Altymyrat Annadurdyýew penalti urgusyny dürs ýerine ýetirip, hasaby açdy. 36-njy minutda kapitanlyk daňysy bilen meýdança çykan Ilýa Tamurkin uzak aralykdan jerime urgusy bilen «Arkadagyň» artykmaçlygyny artdyrdy. Ikinji ýarymda Wladimir Baýramowyň şägirtleri üstünligini dowam etdirdiler we uly hasap bilen ýeňiş gazandylar.

9. Bu tapgyryň beýleki oýunlarynda «Ahal» myhmançylykda 4:1 hasabynda «Köpetdagdan» üstün çykdy, «Merw» öz meýdançasynda 97-nji minutdaky gol bilen «Nebitçini» ýeňdi. «Şagadam» öz meýdançasynda «Aşgabatdan» üstün çykdy – 3:1. Paýtagtyň toparynyň derwezesine ilkinji pökgini ozal Täjigistanyň «Rawşan» toparynda çykyş eden Musa Nurnazarow girizdi.

10. Yslam ýurtlarynda hokkeýi ösdürmek guramasynyň doly hukukly agzasy bolan Türkmenistan ýakynda guramanyň 2025-nji ýyldaky sport çäreleriniň meýilnamasyny aldy. Bu barada Türkmenistanyň Hokkeý federasiýasynyň başlygy Jora Hudaýberdiýew habar berdi. Alnan meýilnama laýyklykda, YÝHÖG Türkmenistana fijital-sporty bilelikde ösdürmegi teklip edýär. Mundan başga-da, gurama üçe-üç hokkeý formatyny işjeň wagyz edýär. Geljek ýylyň maý aýynda YÝHÖG bu ugurlar boýunça, şeýle hem adaty hokkeý boýunça ýaryşlar geçirmegi meýilleşdirýär, olara Türkmenistan milli ýygyndysy hem çagyrylýar.