Halkara jemgyýetçilik ulaglary bileleşigi Türkmenistanyň başlangyjy bilen döredilen Durnukly ulag ulgamynyň dostlary toparyna goşuldy. Bu barada Türkmenistanyň BMG-däki hemişelik wekilhanasy habar berýär.
UITP (Union Internationale des Transports Publics) — Halkara jemgyýetçilik ulaglary bileleşigi bolup, ol 1885-nji ýylda esaslandyryldy. 135 ýyldan gowrak taryhy bolan bu bileleşik jemgyýetçilik ulaglaryna ähli gyzyklanýan taraplary hem-de durnukly ulag usullaryny birleşdirýän dünýädäki ýeke-täk ulgamdyr.
Maglumat hökmünde ýatlatsak, Durnukly ulag ulgamynyň dostlary toparynyň ilkinji ministrler duşuşygy 2024-nji ýylyň 16-njy aprelinde Birleşen Milletler Guramasynyň Nýu-Ýorkdaky baş edarasynda geçirildi. 2022-nji ýylyň 6-njy iýulynda BMG-a agza döwletleriň 90-dan gowrak wekilleriniň gatnaşmagynda Türkmenistanyň BMG-niň ýanyndaky hemişelik wekilhanasy Durnukly ulag boýunça dostlar toparyny döretmek we onuň wezipeleri boýunça maslahat geçirdi. Şol wagt bu topara 11 döwletiň goşulýandygy hasaba alnypdy.
Bu topar BMG-ä agza döwletleriň resmi däl birleşmesi bolup, durnukly ulag ulgamynyň ähmiýetine düşünmekligi, dünýä, sebit we milli derejede bu ugurdaky pikirleri hem-de öňdebaryjy tejribäni paýlaşmagy maksat edinýär. Şonuň bilen birlikde-de, bu topar durnukly ykdysady ösüş goldamak maksady bilen, durnukly ulag ulgamlarynyň ygtybarly, howpsuz we elýeter bolmagyny gazazmak ugrunda hereket edýän meýdança öwrüldi.
Ozal habar berşimiz ýaly, ýakynda Filippinler Respublikasy hem Türkmenistanyň başlangyjy bilen döredilen Durnukly ulag ulgamynyň dostlary toparyna goşuldy.
