12-nji iýulda geçirilen giňişleýin Hökümet mejlisinde Türkmenistanyň Prezidenti Serdar Berdimuhamedow wezipä täze bellenilen wise-premýer B.Orazdurdyýewanyň we ýurduň ylym-bilim ulgamynyň edaralarynyň ýolbaşçylarynyň öňünde durýan möhüm wezipeleri kesgitledi. Döwlet Baştutany täze okuw ýylyna gowy taýýarlyk görmegi, orta we ýokary okuw mekdeplerinde abatlaýyş işlerini geçirmegi, ýokary okuw mekdeplerine zehinli, mynasyp ýaşlary kabul etmegi, giriş synaglaryny guramaçylykly we adalatly geçirip, jemgyýetçilik gözegçiligini ýola goýmagy esasy wezipeleriň hatarynda görkezdi. Şeýle hem bilim maksatnamalarydyr meýilnamalarynyň kämilleşdirilmelidigi, mekdepleriň okuw kitaplary, gollanmalar bilen ýeterlik möçberde üpjün edilmelidigi bellenildi. Bu barada TDH ýazýar.
Ozal habar berşimiz ýaly, Hökümet mejlisiniň barşynda döwlet Baştutany 2024-nji ýylda ýokary we orta hünär okuw mekdeplerine okuwa kabul etmegiň meýilnamasyny tassyklamak hakynda; ýokary we orta hünär okuw mekdeplerine okuwa kabul etmek boýunça döwlet toparynyň düzümini tassyklamak hakynda; 2024-2025-nji okuw ýylynda Türkmenistanyň Prezidentiniň ýanyndaky Döwlet gullugy akademiýasynyň okuwlaryna kabul etmegiň meýilnamalaryny tassyklamak hakynda Buýruklara gol çekip, okuwa girmäge isleg bildirýän ýaşlara uly üstünlikleri arzuw etdi.
2024-nji ýylda Türkmenistanyň ýokary we orta hünär okuw mekdeplerine okuwa kabul etmegiň Tertibi baradaky bildirişler ýurduň «Türkmenistan» we «Neýtralnyý Turkmenistan» merkezi gazetleriniň 13-nji iýuldaky sanynda 12 sahypa möçberinde goşundy görnüşinde çap edildi. Bildirişlere laýyklykda, ýokary okuw mekdeplerine okuwa girmäge isleg bildirýän dalaşgärleriň resmi iş kagyzlary welaýat merkezlerinde we Aşgabat, Arkadag şäherlerinde 15 --- 28-nji iýul aralygynda kabul ediler.
Türkmenistanyň ýokary we orta hünär okuw mekdeplerine okuwa kabul etmek 2024-nji ýylyň 15-nji iýuly — 26-njy awgusty aralygynda guralar.
