Özbek-hytaý arheologlarynyň bilelikdäki gözleg işleri netijesinde Özbegistanyň Surhanderýa welaýatynyň Uzun etrabynda 4 müň ýyl ýaşy bolan mazarlardyr iki müň ýyl ýaşly şäher yzlary tapyldy. Bu barada «Kun.uz» saýty habar berdi.
Bu ýerde ele salnan tapyndylaryň arasynda keramiki gap-gaçlar, ýarag, bezeg şaý-sepleri, heýkeljikler, şäher diňleriniň galyndylary we gadymy mazarlar bar.
Alymlaryň deslapky çaklamalaryna görä, bu arheologiki tapyndylar Kan, Kuşan we Ýueçži (massagetler) döwürlerine degişli bolup, biziň eýýamyzdan öňki II asyr- biziň eýýamymyzyň III asyry bilen senelenýär.
Häzirki wagtda özbek-hytaý arheologlar topary çäkde gözleg-barlag işlerini dowam etdirýär.
