Türkmenistanyň ulag we logistika kompaniýalary 23ؘ — 25-nji aprelde Astrahanda geçiriljek «Hazar sebitiniň ulag logistikasy 2024» atly III halkara foruma gatnaşmaga çagyrylýar.
«Türkmenistan: Altyn asyr» saýtynda berilýän habara görä, forumda Wolga-Hazar ulag we logistika ekologik ulgamyň we Türkmenistanyň esasy üstaşyr geçelgesi wezipesini ýerine ýetirýän Demirgazyk — Günorta halkara ulag geçelgesiniň wajyp meseleleri ara alnyp maslahatlaşylar.
Bu ýyl forumda portlar we terminallar, ýükleme-düşürme we logistika kompaniýalary, ýük iberijiler we ýük eýeleri, suw, demir ýol we gara ýol ulagynyň operatorlary, eksportçylar we importçylar, senagat NKO-lary, Hazar ýurtlaryndan, ýagny Azerbaýjandan, Eýrandan, Gazagystandan, Russiýadan, Türkmenistandan, şeýle hem Ýewraziýanyň beýleki ýurtlaryndan bank, ätiýaçlandyryş we maýa goýum şereketleri çykyş ederler.
Habarda bellenilişi ýaly, foruma gatnaşmak Hazarýaka ýurtlaryndan gelen kompaniýalaryň we guramalaryň wekillerine geljegi uly täze gatnaşyklary ýola goýmaga, Russiýanyň we Hazar ýurtlarynyň bazarlaryndaky iş aýratynlyklaryna has gowy düşünmäge, eksport, logistika, ulag we infrastruktura ugurlarynda bolup biljek hyzmatdaşlaryň gyzyklanýan we garaşýan zatlaryna düşünmäge mümkinçilik berer.
Forumyň 2024-nji ýyldaky iş maksatnamasynyň esasy meseleleriniň arasynda aşakdylar bar:
halkara ykdysady gatnaşyklaryň üýtgeýän şertlerinde Hazaryň ulag logistikasy;
- Hazar çatrygy, Ýewraziýanyň esasy bazarlaryna barýan ulag ýollarynyň artykmaçlyklary we aýratynlyklary;
- Russiýadan we Hazarýaka ýurtlaryndan oba hojalyk önümleriniň eksporty halkara ulag geçelgeleriniň ösüşi, suw ulagy arkaly ýük daşama bazarynyň ýagdaýy we geljegi;
- Hazar we Wolga port infrastrukturasyny döwrebaplaşdyrmak;
- Hazar sebitinde infrastrukturany we ulagy ösdürmek boýunça taslamalar üçin maýa goýum çeşmeleri.
Foruma gatnaşýanlar 23-nji aprelde Astrahanyň birnäçe ýük portuna baryp görmäge we olaryň infrastrukturasy, mümkinçilikleri, iş tejribesi hem ösüş meýilnamalary bilen tanyşmaga mümkinçilik alarlar. Forumyň ikinji gününiň iş meýilnamasy sebitiň Wolga kenaryndaky iň oňat myhmanhanalar toplumynda, şäheriň dolandyryş we iş merkezinde — «Grand Otel Astrahan»-da geçiriler. Forumyň üçünji gününde myhmanlara şäher daşyndaky ajaýyp bir ýerde resmi däl ýagdaýda gatnaşygy ýola goýmaga mümkinçilik berýän özboluşly aragatnaşyk maksatnamasy hödürlenýär diýlip, habarda bellenilýär.
