Türkmenistanda täze, 2024-nji ýyl giň gerimli dabaralar bilen garşylanyldy. Bu barada TDH ýazýar.
Ýurtda Täze ýyl dabaralaryna Prezident Serdar Berdimuhamedowyň hut özüniň badalga berendigini bellemek gerek. Ozal habar berşimiz ýaly, döwlet Baştutany ýaş türkmenistanlylar bilen «Älem» medeni-dynç alyş merkeziniň öňündäki meýdançada Baş arçanyň ýanynda geçirilen dabara gatnaşdy.
31-nji dekabr güni ýurduň Baş arçasynyň ýanynda Aşgabadyň köp sanly ýaşaýjylary we myhmanlary ýygnandylar. Depesinde sekizburçly ýyldyz, «2024» ýazgy ýerleşdirilen Baş arçanyň beýikligi 44 metre, ini bolsa 16 metre deňdir. Döwrebap aragatnaşyk serişdeleriniň kömegi bilen teleköpri arkaly bu dabara ýurduň bäş welaýatynyň ýaşaýjylary gatnaşdylar.
Baýramçylyk äheňinde bezelen «Älem» medeni-dynç alyş merkeziniň açyk sahna meýdançasynda agşam aýdym-sazlar, goşgular belentden ýaňlandy, tanslar ýerine ýetirildi. Çagalar döredijilik toparlary, folklor toparlary, meşhur estrada artistleri öz ussatlyklaryny görkezdiler.
Dabarany alyp baryjylar ähli türkmenistanlylaryň adyndan hormatly Prezident Serdar Berdimuhamedowy hem-de Gahryman Arkadagy «Pähim-paýhas ummany Magtymguly Pyragy» şygary astynda geçjek täze ýyl bilen gutlap, berk jan saglyk, uzak we bagtyýar ömür, Watanyň abadançylygynyň, halkyň rowaçlygynyň bähbidine alyp barýan giň gerimli işlerinde üstünlikleri arzuw etdiler.
Soňra alypbaryjylar paýtagty bu gije diňe bir welaýat merkezleri bilen däl, eýsem, Arkadag şäheri bilen hem baglanyşdyrýan baýramçylyk teleköprüsiniň başlanandygyny yglan etdiler. Göni aragatnaşyk ýurduň dürli sebitleriniň we Aşgabadyň ýaşaýjylaryny birleşdirdi, olar birek-birek bilen baýramçylyk şatlygyny paýlaşdylar.
Arkadag şäheriniň, welaýat merkezleriniň meýdançalarynda hem ýaş aýdymçylaryň we döredijilik toparlarynyň gatnaşmagynda Täze ýyl dabaralary ýaýbaňlandyryldy.
Soňra teleköpriniň dowamynda esasy pursat ýetip geldi: hormatly Prezident Serdar Berdimuhamedow göni ýaýlymda Türkmenistanyň halkyna Täze ýyl Gutlagy bilen çykyş etdi.
Paýtagt şäher Aşgabatda, Arkadag şäherinde hem-de welaýatlarda dabara gatnaşyjylar, millionlarça teletomaşaçylar döwlet Baştutanynyň çykyşyny uly üns bilen diňlediler.
Birnäçe pursatlardan soňra, sagadyň dilleri 12-ni görkezdi. Täze, 2024-nji ýyl başlandy. Türkmenistanyň Döwlet senasy ýaňlandy.
Soňra baýramçylyk feýerwerki öwşün atdy.
