27-nji dekabrda «Arkadag Serdarly bagtyýar ýaşlar» ýylyň netijelerine bagyşlanyp geçirilen Halkara ylmy-amaly maslahatyň we serginiň çäklerinde Aşgabatda «Juwanlyk gözelligi» atly moda görkezilişi geçirildi.
Onda Türkmenistanyň «Mähirli Zenan» Modalar öýi täze egin-eşik toplumyny tanyşdyrdy.
«Mähirli Zenan» brendi gözelligi we milli däp-dessurlary özünde jemleýän lybaslary döredýär. Egin-eşik toplumlary tebigy ýüpekden we mahmaldan tikilen köýnekleri, el keşdeleri we şarflar bilen bezelen milli donlary hem-de ýaglyklary öz içine alýar. Olar bedeniň gözelligini öňe çykarýarlar we gaýtalanmajak özboluşly keşbi döredýärler.
Myhmanlaryň bellemeklerine görä, täze egin-eşik toplumy Türkmenistanyň baý medeniýetini we däp-dessurlaryny aýdyňlygy bilen şöhlelendirýär.
«Mähirli Zenan» – moda ulgamynda geçirilýän ýaryşlara we görkezişlere yzygiderli gatnaşýar. Kompaniýa milli moda pudagynyň ösmegine we türkmen medeniýetiniň meşhurlygynyň artdyrylmagyna goşant goşýar.
