Türkmenistanda
1. Türkmenistanyň Prezidenti Serdar Berdimuhamedow ABŞ-niň Prezidentiniň howanyň üýtgemegi meseleleri boýunça Ýörite wekili Jon Kerri bilen telefon arkaly söhbetdeşlik geçirdi. Söhbetdeşligiň dowamynda taraplar möhüm ekologiýa meselelerini ara alyp maslahatlaşdylar. Dubaýda geçiriljek howa meseleleri boýunça «COP-28» maslahatyna taýýarlyk görmek, klimat meseleleri, hususan-da, Türkmenistanyň we ABŞ-nyň atmosfera goýberilýän metan zyňyndylaryny azaltmak babatda hyzmatdaşlygy hem-de bu ulgamdaky gatnaşyklary hukuk taýdan berkitmegiň mümkinçilikleri söhbetdeşligiň esasy meselesi boldy.
2. Öňümizdäki hepdede Türkmenistanda gündizine +13 gradus temperatura bilen aram salkyn howa garaşylýar. Gijelerine howanyň temperaturasy peseler, esasanam demirgazyk sebitlerde gijelerine -2 gradusa çenli aýazly howanyň bolmagy mümkin. Şeýle hem ýurduň käbir ýerlerinde ýagynyň ýagmagyna garaşylýar.
4. Russiýa Federasiýasynyň Tatarystan Respublikasynyň Baştutany Rustam Minnihanow garly fonda Akdus atly Alabaý itiniň täze suratyny paýlaşdy. Ol bu suraty sosial ulgamda tatar dilinden terjime edilende: «Gözlerinde ak gyş, köňlünde ýalkym!» diýen ýazgy bilen paýlaşdy. Ýatlatsak, türkmen alabaýy Tatarystanyň Baştutanyna 2021-nji ýylda türkmen halkynyň Milli Lideri Gurbanguly Berdimuhamedow tarapyndan sowgat berlipdi, şol wagt Rustam Minnikhanow iş sapary bilen Aşgabatda bolýardy.
5. Türkmenistanda «Däp» egin-eşik brendiniň «Urban Winter-2023/24» atly täze kolleksiýasynyň satuwy başlandy. Brendiň wekiliniň bellemegine görä, her kolleksiýa kompaniýanyň taryhynda täze sahypa. Bu möwsümde «Däp» brendiniň dizaýnerleri häzirki döwürde gyş kolleksiýasynda meşhur bolan sport stili bilen brende mahsus bolan rahat stili utgaşdyryp, kiçi düzüm böleklere çenli üns berdiler. Ünsüňi özüne çekiji açyk reňkdar gyzyl reňk geýim kolleksiýasynyň esasy reňkine öwrüldi.
6. Türkmenistanyň Arkadag şäherinde indi arkadag-shaheri.gov.tm resmi saýty peýda boldy. Häzirki wagtda bu saýtda ýurduň ilkinji «akylly» şäheri, onuň gözel ýerleri we meşhur şahsyýetleri barada dürli maglumatlar elýeterlidir. Saýtda aragatnaşyk üçin forma göz öňünde tutulan – isleg bildirýän her bir adam şäher barada özüni gyzyklandyrýan sorag berip biler we çeşmäniň dolandyryş bölüminden jogap alyp biler.
Dünýäde
7. 28-nji noýabrda prawoslaw hristianlarda Roždestwo mynasybetli agyz beklemeklik başlanýar, ol 40 gün dowam eder we 7-nji ýanwar gijesi, Hristosyň doglan gününiň (Roždestwo) bellenilýän gününde tamamlanar. Agyz beklenilýän döwürde dindarlar et, süýt we süýt önümleri ýaly haýwanlardan alynýan önümleri iýmekden saklanýarlar. Dindarlara balyk we balygyň işbilini, şeýle hem ösümlik ýagyny, kömelekleri, gök önümleri, miweleri, galla önümlerini, hozlary, agyz beklemek üçin niýetlenen çöregi we bişirilýän süýjülikleri, bal, soýa, badam ýa-da beýleki ösümlik süýdüni kabul etmäge rugsat berilýär. Agyz beklemegiň esasy manysy adamyň ruhy taýdan arassalanmagydyr. 40 günüň dowamynda dindar adam has sabyrly, rehimli bolmaly, başgalary bagyşlamagy we kömek etmegi öwrenmeli.
8. 1-nji dekabrdan başlap, «Google» öz hyzmatlarynyň hereketsiz ulanyjy hasaplaryny pozup başlar. Hereketsiz hasaplara iki ýyl bäri ulanylmadyk, ýagny hiç hili iş edilmedik ýa-da giriş amala aşyrylmadyk hasaplar degişlidir. Kompaniýanyň täze syýasaty diňe şahsy hasaplara degişlidir. Ol işewürlik we bilim hasaplaryna täsir etmez.
Sport habarlary
9. Aşgabatdaky Olimpiýa şäherçesiniň Başa-baş söweş sungaty sport toplumynda Kuraş boýunça XIV dünýä çempionatynyň maksatnamasy esasynda ilkinji günüň ýaryşlary tamamlandy. Bäsleşigiň ilkinji gününde türkmen türgenleri iki altyn, üç kümüş we üç bürünç medal gazandylar. Dinara Rozykulowa we Mariýa Lohowa altyn medallara, Aýşirin Haýdarowa, Aýnur Amanowa we Sanjar Abdyrahmanow kümüş medallara, Gülşat Annaýewa, Ruslan Esgerow we Sapa Sapaýew bürünç medallara mynasyp boldular. Bäsleşigiň ikinji gününde medallaryň 28 toplumy ugrunda göreşiler.
10. Şu gün AFK Çempionlar ligasynyň toparçalaýyn tapgyrynyň bäşinji aýlawynyň nobatdaky oýunlary geçiriler. Olaryň birinde Saud Arabystanynyň «Al-Feýhasy» «Ahal» türkmen toparyny kabul eder. Duşuşygyň Aşgabat wagty bilen sagat 21:00-da başlanmagyna garaşylýar. Ýatlatsak, «Ahal» bilen «Al-Feýhanyň» arasynda Türkmenistanda geçirilen ilkinji duşuşyk Serdar Geldiýewiň toparynyň peýdasyna 1:0 hasabynda tamamlanandy.
