Habar berşimiz ýaly, 28-nji oktýabrda Prezident Serdar Berdimuhamedow sanly ulgam arkaly nobatdaky Hökümet mejlisini geçirdi. Ministrler Kabinetiniň Başlygynyň orunbasary, daşary işler ministri Raşid Meredow 2023-nji ýylda bu düzüme Türkmenistanyň başlyklyk etmeginiň çäklerinde geçiriljek «Merkezi Aziýa — Koreýa Respublikasy» hyzmatdaşlyk forumynyň 16-njy mejlisine görülýän taýýarlyk barada hasabat berdi.

Bellenilişi ýaly, türkmen tarapynyň guramagynda şu ýylyň dowamynda 4 sany köptaraplaýyn onlaýn maslahatlar we tegelek stollar geçirildi.

Şeýle hem öňde boljak çäre barada giňişleýin maglumat berildi. Bu barada TDH ýazýar. Hususan-da, forumyň çäklerinde ulag we logistika, saglygy goraýyş we lukmançylyk, howanyň üýtgemegi we daşky gurşawy goramak, maglumat-aragatnaşyk tehnologiýasy, bilim we ylym, syýahatçylyk ugurlaryna degişli 6 mejlisi geçirmek meýilleşdirilýär. Şeýle hem ministrler derejesinde ikitaraplaýyn duşuşyklary guramak göz öňünde tutulýar. Forumyň netijesi boýunça Jemleýji Resminama kabul ediler.

Bu Forumyň çäklerinde Merkezi Aziýa ýurtlarynyň we Koreýa Respublikasynyň Ýaş telekeçileriniň Işewürlik Forumynyň, «Merkezi Aziýa — Koreýa Respublikasy» Işewürler Geňeşiniň dördünji mejlisiniň we «Türkmenistan — Koreýa Respublikasy» Işewürler Geňeşiniň bäşinji mejlisiniň geçirilmegi, Merkezi Aziýa ýurtlarynyň we Koreýa Respublikasynyň gazananlaryna bagyşlanan sergileriň guralmagy hem göz öňünde tutulýar.

Prezident Serdar Berdimuhamedow hasabaty diňläp, Koreýa Respublikasy bilen netijeli hyzmatdaşlygy pugtalandyrmagyň ýurduň daşary syýasy strategiýasynyň möhüm ugurlarynyň biridigini belledi. Deňhukuklylyk, özara bähbitlilik, hormat goýmak we ynanyşmak ýörelgelerine esaslanýan ikitaraplaýyn gatnaşyklar häzirki wagtda işjeň ösdürilýär hem-de hil taýdan täze mazmun bilen baýlaşdyrylýar. Şunda «Merkezi Aziýa — Koreýa Respublikasy» Hyzmatdaşlyk forumynyň möhüm ornuna ünsi çekildi.

Döwlet Baştutany Merkezi Aziýa ýurtlary bilen uzakmöhletleýin esasda hyzmatdaşlygy ösdürmek boýunça alnyp barylýan işleri mundan beýläk-de dowam etmegiň zerurdygyny nygtap, öňde boljak çäräniň ýokary guramaçylyk derejesini üpjün etmegi tabşyrdy.