Türkmenistanyň Ministrler Kabinetiniň Başlygynyň ykdysady, bank we halkara maliýe guramalary meseleleri boýunça orunbasary Hojamyrat Geldimyradowyň 26-njy oktýabrda Şanhaý Hyzmatdaşlyk Guramasyna agza döwletleriň Hökümet Baştutanlarynyň Geňeşiniň mejlisine gatnaşmagyna garaşylýar. Gyrgyz Respublikasynyň Ministrler Kabinetiniň metbugat beýanatynda bu barada aýdylýar.
Şeýle hem şol gün — 26-njy oktýabrda Bişkekde GDA-nyň Hökümet Baştutanlarynyň Geňeşiniň we Ýewraziýa Hökümetara Geňeşiniň mejlisleri hem geçiriler.
«Duşuşyklaryň dowamynda birleşmä agza ýurtlaryň arasyndaky özara gatnaşyklary we hyzmatdaşlygy pugtalandyrmak baradaky häzirki meselelere serediler hem-de söwda-ykdysady, medeni-ynsanperwer ugurlar boýunça birnäçe resminamalara gol çekiler» diýlip, metbugat beýanatynda aýdylýar.
Bu çärelere Türkmenistanyň wekili bilen bir hatarda Belarusyň, Eýranyň, Gazagystanyň, Hytaýyň, Mongoliýanyň, Russiýanyň, Täjigistanyň we Özbegistanyň Hökümet Baştutanlary, şeýle hem Hindistanyň we Pakistanyň daşary işler ministrleri gatnaşarlar.
