Türkmenistanyň futbol boýunça milli ýygyndy topary 8 — 18-nji oktýabr aralygynda Birleşen Arap Emirlikleriniň Dubaý şäherinde okuw-türgenleşik ýygnanyşygyny geçýär.

Türkmen ýygyndysynyň wekilleri okuw-türgenleşik ýygnanyşygynyň çägindäki türgenleşik işlerininiň yzygiderliligini üpjün edýärler.

Futbolçylarymyz ýygnanyşygyň üçünji gününde — 10-njy oktýabrda ýerli «Dubai United» toparynyň garşysyna ýoldaşlyk duşuşygyna çykdylar. Oýun «Dubai Sport Siti» stadionynda geçirildi. Türkmen ýygyndysy bu duşuşygy ýeňiş bilen tamamlamagyň hötdesinden geldi — 3:1. Milli ýygyndymyzyň ýeňşine Ruslan Mingazow, Myrat Annaýew hem-de Elman Tagaýew öz geçiren gollary bilen şärik boldular.

Biziň toparymyz şol günden bäri gündelik türgenleşiklerini gowşatman alyp barýar. Her gün iki wagtyna alnyp barylýan türgenleşikler fiziki we taktiki taýýarlygy özünde jemleýär.

Ildeşlerimiz okuw-türgenleşik ýygnanyşygynyň çäginde ýoldaşlyk duşuşyklarynyň ýene birini geçirerler. 15-nji oktýabrda guraljak duşuşykda türkmen topary «Şabab Al-Ahli» futbol klubunyň garşysyna çykar. Dubaý şäheriniň «Raşid stadium» stadionynda boljak oýun Aşgabat wagty bilen 18:05-de başlanar.

Okuw-türgenleşik ýygnanyşygy Türkmenistanyň milli ýygyndy toparynyň Dünýä çempionaty – 2026-nyň saýlama tapgyryna ykjam taýýarlanmagy üçin guralýar. Ildeşlerimiz şol tapgyrda «E» toparçada çykyş edip, Eýranyň hem-de Özbegistanyň ýygyndy toparlary bilen ýüzbe-ýüz bolarlar. Toparçanyň dördünji wekilini birinji saýlama tapgyrda guraljak Gonkonk bilen Butanyň milli ýygyndylaryň arasyndaky duşuşyk mälim eder.

Türkmenistanyň futbol ýygyndysy dünýä çempionatynyň saýlama tapgyryndaky birinji duşuşygyny 16-njy noýabrda geçirer. Şol gün türkmen topary Özbegistanyň milli ýygyndysynyň garşysyna çykar.