«Ahalyň» goragçysy Ata Geldiýew AFK-nyň Çempionlar ligasynda Birleşen Arap Emirlikleriniň «Al-Aýn» topary bilen geçiriljek duşuşykdan öň metbugat maslahatynda öz pikirlerini peýlaşdy:
– AFK-nyň Çempionlar ligasyna örän güýçli toparlar gatnaşýar. Muny bilýäris, ýöne olaryň her birine mynasyp oýun bilen garşylyk görkezip bolýar. Biz muny Saud Arabystanynyň «Al-Feýhasy» bilen geçiren ilkinji duşuşygymyzda subut etdik.
AFK-nyň Çempionlar ligasynda ýeterlik tejribämiz bar. Şu ýyl ýaryşda geçen ýyldakydan has gowy çykyş etmäge ymtylarys. «Al-Aýn» bilen boljak duşuşykda-da elimizden gelenini gaýgyrmarys. Biziň ähli ukyp-başarnygymyzy orta goýmagymyz we meýdanyň her bir santimetri üçin barlyşyksyz göreş alyp barmagymyz gerek ― diýip, «Ahalyň» metbuagt gullugy tejribeli futbolçynyň aýdanlarynyň jemgyýetçilik torlaryndaky hasaby arkaly paýlaşýar.
Ýeri gelende aýtsak, «Al-Aýn» ― «Ahal» duşuşygyndan bir gün öň guramaçylyk meselelerine bagyşlanan maslahat geçirildi. Onda duşuşyk bilen bagly möhüm meseleler, şol sanda toparlaryň geýjek lybaslary hem ara alnyp maslahatlaşyldy.
Gelnen netijä görä, duşuşykda «Ahal» ýaşyl, «Al-Aýn» bolsa ak reňkli köýnekçede çykyş eder.
Duşuşyk 3-nji oktýabr güni Al-Aýn şäherindäki «Hazza Bin Zaýed» stadionynda geçiriler. Ol Aşgabat wagty bilen agşam sagat 21-de başlanar.
