Türkmenistanyň daşary işler ministriniň orunbasary Mähri Bäşimowa iş sapary bilen Aşgabatda bolýan BMG-niň Ilatly ýerler boýunça maksatnamasynyň (BMG-Habitat) wekilleri Katýa Şefer we Herman Pienaar bilen duşuşdy diýip, Türkmenistanyň daşary syýasat edarasynyň metbugat gullugy habar berdi.
Duşuşykda mundan beýläkki iki taraplaýyn gatnaşyklar üçin aýratyn ugurlar beýan edildi. Şeýle-de Türkmenistan bilen BMG-Habitatyň arasyndaky hyzmatdaşlygyň häzirki ýagdaýy bilen baglanyşykly meseleler ara alnyp maslahatlaşyldy. Şunuň bilen baglylykda, taraplar hyzmatdaşlyk boýunça Ýol kartasyny bilelikde işläp düzmek barada ylalaşdylar diýlip, habarda aýdylýar.
Mundan başga-da, gepleşikleriň barşynda Türkmenistanda BMG-Habitatyň edarasyny açmak mümkinçiligi hem göz öňünde tutuldy.
Ýatlap geçsek, Aşgabadyň BMG-Habitatyň ýurt boýunça edarasyny kabul etmäge taýýardygy iýul aýynda Türkmenistanyň Maliýe we ykdysadyýet ministri Serdar Joraýewiň BMG-niň ilatly ýerler boýunça maksatnamasynyň ýerine ýetiriji direktory Maimuna Mohd Şerif bilen Nýu-Ýork şäherinde geçirilen duşuşygynda hem mälim edilipdi. Şol bir wagtyň özünde, ministr şu ýylyň sentýabr aýynyň başynda BMG-Habitatyň hünärmenlerini Türkmenistana sapar bilen çagyrypdy.
