Türkmenabat şäherindäki «Goşa çynar» toý mekanynda Türkmenistanyň Kärdeşler arkalaşyklarynyň Milli merkeziniň yglan eden «Ussat bagban» bäsleşiginiň welaýat tapgyry geçirildi. Oňa welaýatyň etraplaryndan bagbanlaryň 10-dan gowragy gatnaşdy. Bu barada Jeyhun.news ýazýar.
Bäsleşikde dürli miweli baglary ýetişdirmekde işine ussatlaryň şu ýylda alan hasyllarynyň möçberine, hiline, harytlyk görnüşlerine, tagamyna baha berildi.
Şeýlelikde, Saýat etrabynyň «Gülüstan» daýhan birleşiginiň bagbany Sülgün Agamamedowa birinji orny eýeledi we bäsleşigiň döwlet tapgyryna gatnaşmaga hukuk gazandy. Ýeňiji diýlip saýlanan zenan üstümizdäki ýylda her düýp erik agajyndan 70 — 100 kilogram aralygynda hasyl almagy başarypdyr.
Habarda bellenilişi ýaly, ikinji orny eýelän Serdar Döwranow bolsa Halaç etrabynyň Magtymguly adyndaky daýhan birleşigindäki bagynda alma, erik, garaly ýaly miweleriň 10 tonna golaý hasylyny ýetişdiripdir.
Türkmenistanyň Kärdeşler arkalaşyklarynyň Kerki etrap birleşmesiniň hünärmeni Suraý Hudaýberdiýewa üçünji orna mynasyp boldy. Ol Osman Söhbetow adyndaky daýhan birleşigindäki 7 gektar bagyndan almanyň we şetdalynyň 4 tonna hasylyny almagy başarypdyr.
