1. Halk Maslahatynyň Başlygy Gurbanguly Berdimuhamedowyň ýolbaşçylygyndaky türkmen wekiliýeti Mekge şäherindäki Al Haram metjidinde juma namazyny okady. Soňra türkmen halkynyň Milli Lideri Gurban baýramy mynasybetli sadaka berdi. Halk Maslahatynyň resmi saýtynyň habar bermegine görä, gurbanlyk sadakasyna türkmen wekiliýetiniň agzalary, şeýle hem mukaddes Käbä haj parzyny berjaý edýän zyýaratçylar gatnaşdylar.
2. Penşenbe güni Prezident Serdar Berdimuhamedowyň gatnaşmagynda Türkmenistandaky ilkinji «akylly» şäher bolan Arkadag şäheriniň açylyş dabarasy geçirildi. Açylyş dabarasynyň dowamynda türkmen tarapyna Arkadag şäheriniň dürli ugurlar boýunça gazananlaryny tassyklaýan 21 sany halkara güwänamalary we diplomlar gowşuryldy.
3. Mundan başga-da, täze Arkadag şäheri Kazanyň hem-de Gruziýanyň Telawi şäheriniň doganlyk şäheri boldy. Hyzmatdaşlyk hakyndaky degişli resminamalara döwlet ähmiýetli şäheriň açylan gününde şäher häkimliginde gol çekildi. Şeýle hem Aşgabat şäheri bilen Baku şäheriniň arasynda doganlyk gatnaşyklaryny ýola goýmak barada özara düşünişmek hakynda Ähtnama gol çekildi.
7. Şol gün Türkmenistanda täze «Arkadag» teleýaýlymy öz işine başlady. Ýaýlym eýýäm tomaşa etmek üçin hem-de onlaýn görnüşinde elýeterlidir. Tomaşaçylaryň dykgatyna «akylly» Akadag şäheriniň desgalary hakynda gürrüň açýan maglumat beriji-öwrediji gepleşikler hödürlenýär.
8. 30-njy iýunda täze şäherde Türkmenistanyň Senagatçylar we telekeçiler birleşmesi tarapyndan guralan ilkinji maýa goýum forumy geçirildi. Forumda çykyş edenleriň biri hem meşhur işewürlik tälimçisi, ykdysady ylymlaryň doktory, şahsyýet ösüşi baradaky birnäçe kitaplaryň awtory Saidmurod Dawlatowdyr. Ol öz çykyşynda köpýyllyk tejribesini paýlaşdy, türkmen we daşary ýurt kompaniýalarynyň arasynda sinergiýa hyzmatdaşlygyny ýola goýmagyň wajyplygy barada gürrüň berdi, şeýle hem täze «akylly» Arkadag şäheriniň maýa goýum mümkinçilikleri barada belläp geçdi.
9. Şol gün halkara mediaforum geçirildi, oňa daşary ýurtly myhmanlar, Türkmenistanyň birnäçe edaralarynyň ýolbaşçylary, daşary ýurtly we ýerli köpçülikleýin habar beriş serişdeleriniň wekilleri gatnaşdylar. Forumyň çäklerinde meşhur rus žurnalisti, Bütinrussiýa döwlet telewizion we radioeşitdiriş kompaniýasynyň (WGTRK) Merkezi Aziýa býurosynyň ýolbaşçysy Robert Fransew çykyş edip, Arkadag şäheriniň açylmagy türkmen halkynyň geljekki üstünlikleri üçin möhüm badalga nokady bolar diýip belledi.
10. «Ahal» we «Arkadag» futbol toparlarynyň arasynda geçiriljek dostluk duşuşygy täze «akylly» şäheriň 10 müň tomaşaça niýetlenen stadionynda geçiriljek ilkinji oýun bolar. «Ahal» bilen «Arkadagyň» arasyndaky duşuşyk şu gün ýerli wagt bilen sagat 19:00-da geçiriler.
11. Türkmen futbolçylary 2023/2024-nji möwsümden başlap Türkiýäniň çempionatynda legionerler diýlip hasaplanmaz. Täze düzgünlere görä, toparyň düzümindäki Azerbaýjanyň, Gazagystanyň, Gyrgyzystanyň, Özbegistanyň we Türkmenistanyň raýaty bolan maksimum bir futbolçynyň legioner diýlip hasaplanmajakdygyny bellemek gerek.
12. 23 – 30-njy iýul aralygynda Duşenbe şäherinde futzal boýunça taryhdaky ilkinji СAFA Futsal Cup-2023 çempionatynyň duşuşyklary geçiriler. Owganystanyň, Eýranyň, Gyrgyzystanyň, Täjigistanyň, Türkmenistanyň we Özbegistanyň milli ýygyndylary Merkezi Aziýa sebitiniň iň güýçli topary diýen at ugrunda güýç synanyşarlar. Ýaryşyň tertipnamasyna görä, çempionat aýlaw ulgamy boýunça bir aýlawda geçiriler. Ýeňiji toplanan utuklaryň sanyna görä kesgitlener.
