Türkmenistanyň Pakistandaky ilçihanasynda Pakistanyň Premýer ministriniň Söwda we senagat boýunça utgaşdyryjysy Rana Ihsan Afzal Han we ýurduň işewürler wekiliýet bilen Türkmenistanyň ilçisi A.Möwlamowyň arasynda duşuşyk geçirildi.

15-nji iýunda bolan duşuşygyň dowamynda taraplar bilelikdäki iri taslamalaryň, ýagny, Türkmenistan — Owganystan — Pakistan — Hindistan gaz geçirijisiniň, Türkmenistan — Owganystan — Pakistan ugry boýunça elektrik geçiriji we optiki-süýmli aragatnaşyk ugurlarynyň taslamalarynyň durmuşa geçirilişi barada maslahatlaşdylar.

Şunuň bilen baglylykda, türkmen tarapy ýaňy-ýakynda Türkmenistanyň wekiliýetiniň Pakistana amala aşyran saparyny we 2023-nji ýylyň 8-nji iýunynda TOPH gaz geçirijisi taslamasynyň durmuşa geçirilişini tizleşdirmek boýunça ýerine ýetirilmeli çäreleriň bilelikdäki Meýilnamasyna gol çekilendigini belledi.

Taraplar agzalan meýilnama gol çekilmeginiň TOPH gaz geçiriji taslamasynyň durmuşa geçirilmegi üçin möhüm ädim bolandygyny nygtadylar. Şeýle hem TOPH we TOP taslamalarynyň amala aşyrylmagy sebitiň gülläp ösmegine we Pakistanyň ykdysady ösüşine goşant goşjakdygy aýratyn bellenildi.

Bilelikdäki iri taslamalaryň Pakistanyň energiýa howpsuzlygy üçin ähmiýetini belläp, Rana Ihsan Afzal Han Pakistanyň hökümetiniň bu möhüm energiýa taslamalarynyň gysga wagtda tamamlanmagyny goldaýandygyny aýtdy.

Duşuşykda Türkmenistan bilen Pakistanyň arasyndaky söwda we ykdysady hyzmatdaşlygyň geljegi hem ara alnyp maslahatlaşyldy. Taraplar energiýa pudagynda ikitaraplaýyn söwdanyň ägirt uly mümkinçiligini nygtadylar. Bu barada Türkmenistanyň DIM-niň resmi saýtynda habar berýär.

Şeýle-de okaň:

• Türkmenistan bilen Pakistanyň arasynda TOPH gaz geçiriji taslamasynyň durmuşa geçirilişini çaltlandyrmak baradaky bilelikdäki Meýilnama gol çekildi