Şu gün, 10-njy aprelde Türkmenistanyň daşary syýasat edarasynyň binasynda Türkmenistanyň daşary işler ministriniň orunbasary Mähri Bäşimowanyň BMG-niň Ilat Gaznasynyň (UNFPA) Türkmenistandaky edarasynyň ýolbaşçysy Aýna Seýitliýewa bilen duşuşygy geçirildi.
Duşuşygyň dowamynda 2021 — 2025-nji ýyllar üçin tassyklanylan ýurt boýunça hyzmatdaşlyk maksatnamasynyň çäklerinde Türkmenistanyň UNFPA bilen hyzmatdaşlygynyň meseleleri ara alnyp maslahatlaşyldy. Bu barada DIM-niň resmi saýtynda habar berildi.
Taraplar şeýle hem Türkmenistanyň ministrlikleri we pudak edaralary bilen ýyllyk meýilnamalaryň çäklerinde bilelikde üstünlikli alnyp barylýan işleri beýan etdiler. Şunuň bilen baglylykda, gender deňligi, zenanlaryň hukuklaryny we mümkinçiliklerini giňeltmek, reproduktiw saglyk we maşgalanyň meýilleşdirilişi ýaly ugurlar boýunça netijeli hyzmatdaşlyk nygtaldy.
Taraplar ileri tutulýan ugur hökmünde ýaşlar syýasaty ulgamynda hem özara hereketleriň işjeňleşdirilmelidigini aýratyn bellediler.
