Nigeriýaly hüjümçi Wiktor Osimhen «Napolide» bassyr gol urmak boýunça Iguainiň rekordyny täzeledi. Osimhen A seriýanyň 23-nji tapgyryndan orun alan «Sassuolo» bilen oýunda gollaryň birini öz adyna ýazdyrdy. Duşuşyk 2:0 hasabynda «Napoliniň» peýdasyna tamamlandy.
«Sassuolonyň» derwezesine gol uran Osimhen «Napoliniň» düzüminde bassyr ýedinji oýunda tapawutlanmagy başardy. Şeýlelikde, ol bu ugurda Gonsalo Iguaini yzda galdyryp, rekordy öz adyna geçirdi. Iguain 2015/16-njy ýylky futbol möwsüminde «Napoliniň» lybasynda bassyr alty oýunda gol urupdy.
Wiktor Osimhen şu möwsümde «Napoliniň» düzüminde jemi 23 duşuşyga gatnaşyp, 19 gol urdy we 4 gezek golly pas berdi.
Ýeri gelende bellesek, «Napoli» «Sassuolony» ýeňlişe sezewar etmek arkaly, A seriýanyň turnir tablisasynyň ikinji ornunda barýan «Inter» bilen aratapawudy 18 utuga çykardy. Häzirki wagtda birinji ýerde barýan «Napoliniň» hasabynda 23 oýundan soňra 62 utuk, ikinji ýerdäki «Interde» bolsa 22 oýundan soňra 44 utuk bar. «Inter» tapgyrdaky oýnuny şu gün gije öz öýünde «Udinezä» garşy geçirer.
