Türkmenistanda 1995-nji ýyldan bäri 27 500 töweregi bosgun we raýatlygy bolmadyk adamlar ýurduň raýatlygyna kabul edildi. Bu barada BMG-niň Bosgunlaryň işi baradaky Ýokary Komissarynyň Müdirliginiň Merkezi Aziýa boýunça wekili Hans Fridrih Şodder mälim etdi diýip, «Trend» habar berýär.
Habar berlişine görä, 2023-nji ýylyň sentýabr aýynda Türkmenistandaky ahyrky 13 sany bosgun hem ýurduň raýatlygyna kabul ediler. BMG-niň Bosgunlaryň işi baradaky Ýokary Komissarynyň Müdirliginiň Merkezi Aziýa boýunça wekili Hans Fridrih Şodder bu barada şeýle diýdi:
— 2022-nji ýylyň sentýabr aýynda ýene 1,530 raýatsyz adama Türkmenistanyň raýatlygy berildi. Ýigrimi ýyldan gowrak wagt bäri bu gurama ýurda bosgunlary kabul etmekde, olary derejelendirmekde, durmuş goraglylygyny üpjün etmekde we jemgyýete goşulmaklaryny gazanmakda ýardam edip gelýär. BMG-niň Bosgunlaryň işi baradaky Ýokary Komissarynyň Müdirligi 2023-nji ýylyň sentýabryna çenli Türkmenistanda soňky on üç bosgunyň hem bu ýurduň raýatlygyna kabul edilmegine garaşýar.
Ýeri gelende bellesek, 2019-njy ýylyň ýanwarynda Türkmenistanda raýatsyzlyk ýagdaýyny ýok etmek boýunça hereketleriň Milli meýilnamasy, 2021-nji ýylda bolsa Türkmenistandaky daşary ýurt raýatlarynyň, raýatlygy bolmadyk adamlaryň hukuk ýagdaýyny kesgitleýän kanunçylyk namasy kabul edilipdi.
