Isa-Taun şäherinde (Bahreýn Patyşalygy) tennis boýunça 14 ýaş we şondan kiçi türgenleriň arasynda geçýän Günbatar we Merkezi Aziýa sebitiniň ýaryşynda Türkmenistanyň ýygyndy topary netijeli çykyş edýär.
Türkmenistanly tennisçiler Selim Çagylow we Imran Ahundow bilelikde jübütleýin ýaryşyň finalyna çenli baryp ýetdiler. Jemleýji duşuşykda özbek jübütinden asgyn gelen türkmen topary saýlama ýaryşda ikinji orna eýe boldy.
Ýeri gelende bellesek, Selim paýtagtdaky 18-nji orta mekdebiň 8-nji synp okuwçysydyr. Tennisçiler maşgalasynda önüp-ösen ýetginjegiň kakasy Döwran Çagylow Dewisiň Kubogynda çykyş eden ilkinji türkmenistanly türgen hökmünde tanalýar. Imran bolsa Aşgabat şäherindäki 27-nji ýöriteleşdirilen orta mekdebiň 8-nji synpynda okaýar.
Mundan başga-da, türkmen toparyndan Aşgabat şäherindäki 42-nji ýöriteleşdirilen orta mekdebiň okuwçysy Ilim Guseýnowa ýeňiş üçin ýiti göreş alyp bardy. Finaldaky bäsdeşinden 1:2 hasabynda ýeňlen Ilim bu ýaryşda ikinji orna mynasyp boldy.
Indi türkmen tennisçilerine ýaryşyň nobatdaky tapgyry garaşýar.
Ýaryşa jemi 14 döwletden 56 türgeniň gatnaşandygyny ýatladýarys.
