«Arsenal» Angliýanyň premýer-ligasynyň 19-njy tapgyrynda «Nýukasl» bilen deň oýnady. Londondaky «Emereýts» stadionynda geçirilen duşuşyk 0:0 hasabynda tamamlandy. Ýeri gelende bellesek, «Arsenal» şu möwsümde ilkinji gezek içerki çempionatyň oýnunda meýdançany golsuz terk etmäge mejbur boldy. «Nýukasl» bolsa ähli ýaryşlardaky ýeňlişsiz seriýasyny 15 oýuna ýetirdi. Şeýle-de ýanwaryň 3-den 4-ne geçilen gijede «Mançester Ýunaýted» öz öýünde «Bornmuty» kabul edip, 3:0 hasabynda ýeňiş gazandy. «Ýunaýtede» ýeňiş getiren gollar Kazemiro (23), Şou (49) we Reşford (86) tarapyndan geçirildi. Mundan başga-da tapgyrda «Braýton» myhmançylykda «Ewertony» 1:4, «Fulhem» myhmançylykda «Lesteri» 0:1 hasabynda ýeňlişe sezewar etdi.
Şeýlelikde 19-njy tapgyrdan soňra 17 oýunda 44 utuk toplan «Arsenal» turnir tablisasynda liderlik edýär. Ikinji orun 16 oýunda 36 utuk toplan «Mançester Siti» toparyna degişli. Şeýle-de güýçli bäşlikde «Nýukasl» (18 oýun, 35 utuk), «Mançester Ýunaýted» (17 oýun, 35 utuk) we «Tottenhem» (17 oýun, 35 utuk) toparlary bar. Tapgyr Aşgabat wagty bilen 6-njy ýanwarda sagat 1:00-da geçiriljek «Çelsi» — «Mançester Siti» oýny bilen jemlener.
19-njy tapgyryň netijeleri
3-nji ýanwar:
- «Brentford» — «Liwerpul» 3:1.
4-nji ýanwar:
- «Arsenal» — «Nýukasl» 0:0;
- «Ewerton» — «Braýton» 1:4;
- «Lester» — «Fulhem» 0:1;
- «Mançester Ýunaýted» — «Bornmut» 3:0.
19-njy tapgyryň indiki oýunlary
5-nji ýanwar:
- 00:30. «Sauntgempton» — «Nottingem Forest»;
- 00:45. «Lids Ýunaýted» — «West Hem»;
- 01:00. «Astin Willa» — «Wulwerhempton»;
- 01:00. «Krystal Pelas» — «Tottenhem».
6-njy ýanwar:
- 01:00. «Çelsi» — «Mançester Siti».
