Girmek
Habar berşimiz ýaly, şu gün Türkmenistanda güýzlük bugdaý ekişine köpçülikleýin girişildi. Türkmenistanyň Prezidenti Serdar Berdimuhamedowyň Ministrler Kabinetiniň 26-njy awgustda geçirilen mejlisinde beren tabşyrygyna laýyklykda, bu möhüm oba hojalyk möwsümi ýurduň ähli welaýatlarynda birbada badalga aldy.
Ekişe azyklyk bugdaýyň ýokary hasylly «Bereketli», «Goşant», «Rowaç», «Hasylly», «Sähraýy», «Ýolöten-3», «Watan», «Juwan», “Ýokumly», «Ýolöten-1», «Miras» görnüşleriniň tohumlary taýýarlanyldy. Şu möwsümde Türkmenistan boýunça dünýäniň öňdebaryjy «John Deere», «CLAAS», «Case» kompaniýalaryndan satyn alnan ýer sürüji traktorlaryň iki müňe golaýy, ekijileriň we bejergi traktorlarynyň bir müň bäş ýüzden gowragy ulanylar.
Oba hojalygyny depginli ösdürmek Türkmenistanyň Prezidentiniň alyp barýan syýasatynyň ähmiýetli ugurlarynyň biridir. Şol syýasat ýurduň ykdysady kuwwatyny pugtalandyrmaga, halkyň hal-ýagdaýyny ýokarlandyrmaga gönükdirilendir. Bu ulgamda daşary ýurtlardan getirilýän harytlaryň ornuny tutýan önümçilikleri ösdürmek we dürli oba hojalyk önümleriniň öndürilişini artdyrmagyň hasabyna, obasenagat toplumynyň eksport kuwwatyny ýokarlandyrmak babatda wezipeleriň çözgüdine ýardam bermäge gönükdirilen giň gerimli özgertmeler üstünlikli amala aşyrylýar.