Mary welaýatynda çarşenbe güni açylan medeniýet hepdeliginiň çäklerinde «Mary» myhmanhanasynda köpçülikleýin habar beriş serişdeleriniň halkara derejesindäki hyzmatdaşlyk meselelerini özünde jemleýän halkara media forumy geçirildi. Bu barada «Нейтральный Туркменистан» gazetinde habar berilýär.

Gibrid formatda geçen bu çärä türkmen köpçülikleýin habar beriş serişdeleriniň wekilleri, ýokary okuw mekdepleriň professor-mugallymlary gatnaşdylar. Halkara forumyň işine şeýle-de daşary ýurtlaryň tejribeli žurnalistleri we bilermenleri gatnaşdylar. Olaryň hatarynda Russiýanyň «TASS» habarlar agentliginiň Baş direktorynyň orunbasary Mihaýil Gusman, Aziýa-Ýuwaş ummany habar beriş bileleşiginiň (ABU) Baş direktory Jawad Mottagi, «Russia Today» teleýaýlymynyň Baş direktory Alekseý Nikolow, TRT teleýaýlymynyň Türkmenistandaky wekili Ugur Sani Gezer, «Azerbaýjanyň radiosy we telewideniýesi» ÝGPJ-niň başlygynyň orunbasary Rafik Gaşimow we beýlekiler gatnaşdylar.

Forumyň gün tertibinde milli medeniýetiň we sungatyň ornuny aýdyňlaşdyrýan meseleler, köpçülikleýin habar beriş serişdeleri arkaly progressiw özgertmeler syýasatyny alyp barmakda, ýurduň taryhy we medeni ýadygärliklerini wagyz etmekde, geljekki nesillere türkmen halkynyň baý mirasyny ýetirmekde, milli ruhy we ahlak däpleriniň hem-de maşgala gymmatlyklarynyň dowamatyny wagyz etmekde zerur aýratynlyklar we maslahatlar nazarda tutuldy.

Oňa gatnaşanlar Türkmenistanda syýahatçylygy ösdürmegiň esasy ugurlary, geçmişiň özboluşly binagärligini gorap saklamak boýunça görülýän çäreler, daşary ýurt teleýaýlymlarynda garaşsyzlyk ýyllarynda gazanan üstünliklerini giňişleýin görkezmek boýunça işleriň ýokarlandyrylmagy baradaky çykyşlary diňlediler.

Bellenilişi ýaly, häzirki wagtda köpçülikleýin habar beriş serişdelerinde möhüm, täze maglumat dünýäsi gurşalandyr. Ösen tehnologiýalary işjeň ulanmak we bu ugurda ýüze çykýan kynçylyklar, şeýle hem ygtybarly habarlary öndürmek we ýaýratmak meselesinde köpçülikleýin habar beriş serişdeleriniň öňünde durýan ileri tutulýan ugurlara aýratyn ähmiýet berildi.

Gatnaşanlaryň biragyzdan bellemegine görä, Medeniýet hepdeliginiň çäginde ilkinji gezek geçirilen häzirki metbugat forumy degişli pudaklaryň arasynda tejribe alyşmak we gatnaşyklary berkitmäge gönükdirilen uzak möhletli hyzmatdaşlygy gurmak üçin amatly platforma boldy. Bu tagallalar öz nobatynda milli žurnalistikany ösdürmek üçin öňdebaryjy tejribäni we häzirki zaman tehnologiýalaryny öwrenmek we olary işjeň ulanmak, dünýä maglumat giňişliginde özara gatnaşyklary alyp barmak ýaly işler üçin uly mümkinçilikleri döredýär.