Afrika ýurtlarynyň, esasan-da, Sudanyň, Efiopiýanyň we GAR-yň 345 milliondan gowrak ýaşaýjysy çynlakaý azyk gytlygyny başdan geçirýär diýip, düýn Gyzyl Hajyň Halkara Geňeşi (GHHG) habar berdi.
Ýagdaýyň howsala döredýändigi guramanyň Twitterdäki sahypasynda ýerleşdirilen habarynda bellenýär.
Maglumatlara görä, azyk önümleriniň ýetmezçiligi şeýle-de Burkina-Fasoda, Kongo Demokratik Respublikasynda, Kamerunda, Keniýada, Mawritaniýada, Malide, Nigerde, Nigeriýada, Somalide we Çadda hasaba alyndy.
Dünýäde emele gelen ýagdaý zerarly, Birleşen Milletler Guramasy Günorta Sudana azyk heläkçiligini ýeňmek üçin 426 million ABŞ dollaryny bölüp bermäge çagyrdy.
Geçen hepdede BMG-niň Azyk we oba hojalyk guramasynyň bazarlar we söwda bölüminiň direktory Bubaker Ben-Belhassen Ukrainanyň töweregindäki ýagdaýyň dünýäde açlyk çekýänleriň sanyny 2022-2023-nji ýyllarda 11-19 milliona çenli artdyryp biljekdigi barada beýanat berdi.
Ol dänäniň, ösümlik ýagynyň we günebakar ýagynyň importyna güýçli garaşly bolan Ýakyn Gündogar we Demirgazyk Afrika döwletleriniň hem töwekgelçilige uçrajakdygyny nygtady. Hatda Bangladeş we Indoneziýa hem kyn ýagdaý bilen ýüzbe-ýüz galdy diýip, Bubaker Ben-Belhassen sözüniň üstüne goşdy.
BMG-niň ählumumy krizis topary öň nutuk çap edip, onda bütin dünýäde 1,6 milliard adamyň açlyk we garyplyk howpunyň astyndadygy habar berlipdi. Bu barada «www.interfax.ru» ýazýar.
