Balkan welaýat döwlet drama teatrynda «Iň eýjejik gyzjagaz — 2022» atly şadyýan bäsleşigiň geçirildi. Türkmenistanyň Magtymguly adyndaky Ýaşlar guramasynyň Merkezi geňeşiniň hem-de Bilim ministrliginiň Milli bahar baýramy mynasybetli ýurduň orta mekdepleriniň 2-4-nji synplarynda okaýan okuwçy gyzlarynyň arasynda yglan edilen bäsleşige onuň etrap-şäher tapgyrlarynda ýeňiji bolan zehinli gyzjagazlar gatnaşdylar.
«Balkan» welaýat gazetiniň habar bermegine görä, bäsleşige gatnaşan gyzjagazlar şirin owazly aýdym-sazlarda Prezident Gurbanguly Berdimuhamedowyň alyp barýan beýik işleriniň, bagtly çagalygyň waspyny ýetirdiler. Milli lybasly gyzjagazlar dakynan şaý-seplerini taryp etdiler, ýaş aýratynlyklaryna görä, ene-mamalardan miras galan el işlerini ýerine ýetirmekde başarnyklaryny görkezdiler.
Bäsleşigiň ahyrynda eminler toparynyň gelen netijesine laýyklykda, Serdar şäherindäki 7-nji orta mekdebiň 4-nji synp okuwçysy Gülendam Merdanowa birinji, Balkanabat şäherindäki 6-njy orta mekdebiň 3-nji synp okuwçysy Nurjahan Täşliýewa ikinji orunlara mynasyp boldular we bäsleşigiň döwlet tapgyryna gatnaşmaga hukuk gazandylar.
Ýeňiji bolan eýjejik gyzjagazlara Hormat hatlary we sowgatlar gowşuryldy.
